Sekretari i Jashtëm i Britanisë së Madhe, Boris Xhonson, vizitoi qëndron Kosovën. Ai u takua me kryetarin e Kuvendit të Kosovës, Kadri Veseli dhe, më pas, mori pjesë në seancën solemne të Kuvendit të Kosovës, ku morën pjesë kryeministri i Kosovës, Isa Mustafa, ministra të kabinetit qeveritar, ambasadori i SHBA-së Greg Delaui, përfaqësuesja e Bashkimit Evropian në Kosovë, Natalia Apostolova si dhe përfaqësues të zyrave diplomatike. Gjatë fjalimit në seancën solemne, kryetari i Kuvendit të Kosovës Kadri Veseli tha se vizita e Sekretarit Xhohnson është shprehja e marrëdhënieve të mira mes Kosovës dhe Britanisë së Madhe dhe se emri i këtij vendi është i lidhur në mënyrë të pandashme me historinë e lirisë dhe pavarësisë së Kosovës. Sekretari Xhonson gjatë fjalimit të tij foli për gjendjen në vend, duke e krahasuar me vizitën e tij në Kosovë para 17 vitesh. Ai theksoi se Kosova mund të jetë një shembull i fuqishëm për të tjerët për atë se çfarë mund të arrihet. Sekretari vuri në pah se, si shumë sisteme të tjera politike, edhe sistemi i Kosovës duhet të përshtatet dhe përmirësohet. “Partitë politike duhet të punojnë që t’i shërbejnë interesit të qytetarëe. Njerëzit kanë të drejtë të kërkojnë më shumë nga përfaqësuesit e tyre të zgjedhur dhe llogari prej tyre”, tha Xhonsoni. Ai shtoi se Britania e Madhe dëshiron që Kosova të jetë një forcë stabilizuese në të gjithë Ballkanin Perëndimor dhe kësaj i shërbejnë marrëdhëniet normale me Serbinë. Ai theksoi se bota ka sot sfida të përbashkëta si terrorizmi apo lufta kundër korrupsionit ndja këto kërcënime duhen luftuar së bashku.
