Reforma në Drejtësi dhe llogaritë për kalimin e saj kanë rihapur një plagë të njohur dhe mbi të gjitha shumë problematike të politikës shqiptare në 25 vitet e fundit.
Atë të trafikimit të votave, ose thënë ndryshe, të blerjes apo shkëmbimit të tyre në favore të tjera ekstrapolitike.
Ky është një nga fenomenët më të rrezikshëm të minimit të demokracisë së një vendi, pa llogaritur fare, koston ekonomike në rast se ky fenomen ndodh për një shtet me ekonomi tepër të brishtë.
Skenarët flasin se reforma do realizohet, pavarësisht shpenzimeve që do kryhen për të arritur një qëllim të tillë.
Skenari i parë, më i shpeshti që po leviz këto ditë meskorriku, është se Partia Socialiste ka hedhur miliona euro për të arritur të blejë një grup deputetësh të lëkundur nga opozita.
Skenari i dytë, jo më pak i përmendur, është ai i gjetjes së ceneve ligjore që deputetë të opozitës mund të kenë apo kanë kryer në të ardhmen. Për katë politikanë, forma më e mirë e bindjes, ka qenë shantazhi.
Skenari i tretë, që qarkullon jo pak herë në korridoret e politikës, është joshja e një apo dy deputetësh, kryesisht nga PD-ja, ku tensionet mes kreut të kësaj partie dhe tyre janë ashpërsuar jashtëmase kohët e fundit.
Premtimi se në Partinë Socialiste do gjejnë vetveten por edhe vazhdimin e tyre të karrierës, që me shumë gjasa, në partinë ku janë e kanë të mbyllur, nuk është një tundim i paqenë për t’u marrë në konsideratë.
Cilido që ka marrë përsipër të bëjë një hap të tillë, do apo s’do ai, nuk mund të mashtrojë qytetarët e këtij vendi, në kohën kur llumi ka dalë jashtë dhe ta shesë një akt të tillë si çështje parimore.
Qytetarët e dinë mjaft mirë, se ai deputet që voton në kundërshtim me vendimin e partisë, e bën këtë jo se ka bindjen se po i shërben vendit, jo se beson se sistemi i sënesërmes do të bëhet më i mirë dhe as se kjo është një betejë parimore e tij apo e asaj, pavarësisht faktit si do shitet.
Ai apo ajo që e bën këtë, nëse nuk është në presion të drejtpërdrejtë të Edi Ramës, është shitur në shkëmbim të favoreve apo eurove që tregu i korrikut i ka ofruar.
Megjithatë, skenari që mban statusin “Top 1”, është blerja e deputetëve. Zërat konfidencial për Opinion.al kanë bërë me dije se shumat janë marramendëse, madje deri në kufijtë e të pabesueshmes.
Por, deri në këto çaste, askush nuk ka bërë një llogari të thjeshtë matematikore se sa do i kushtonte një miratim i kësaj reforme me vota të blera apo të trafikuara, jashtë çdo lloj konsensusi partiak ekonomisë së vendit.
Po nga i njëjti burim, u bë me dije, se deri para 24 orëve tregu për blerejn e një grupi të vogël deputetësh nga opozita, kapi shifrën e 2.5 milion eurove, pak a shumë, i bie se me aq para, vetëm në QSUT do të rregullohej jo vetëm urgjenca e këtij spitali, që është në gjendje mjeruese, por edhe shumë sektorë të tjerë jetik për qytetarët.
Hedhja e kaq parave, për të blerë dy apo tre vota, do të krijonte mundësinë e një ndërtimi shkolle, moderne në çdo vend të Shqipërisë.
Por ja që një shumë e tillë, po ikën sipas oreksit të politikës shqiptare dhe, varavingove të tyre, sa andej këtej, për të miratuar Reformën në Drejtësi.
