Kryetari i Kuvendit Ilir Meta i ka dërguar një ftesë sot, Kryetarit të PD-së, Lulzim Basha për t’u takuar për Reformën në Drejtësi, por duke e kushtëzuar takimin vetëm me kohën: “Deri të hënën – tha ai. – Jam shumë fleksibël për orën, për vendin dhe për formatin, por nuk jam fleksibël për kohën. Jemi në krizë” – nënvizoi.
Kryeparlamentari Ilir Meta dha një deklaratë për mediat nga Kryesia e Kuvendit, ku pranoi që në krye se kishte ndodhur një “keqkuptim” nga Kuvendi kur ishte futur, Reforma në Drejtësi, në kalendarin 3-javor të punimeve, e cila tani ishte hequr:
“Çështja e kalendarit është sqaruar dhe me Nënkryetarin e PD, z.Paloka, ka qënë një keqkuptim i shërbimeve të Kuvendit, – tha Meta – dhe kjo çështje nuk është në Kalendarin e Kuvendit.” Më pas, ai njoftoi se i kishte kërkuar, takim, Bashës.
Meta tha: “Me këtë rast dëshiroj të bëj të ditur për mbarëvajtjen dhe konkludimin e reformës në drejtësi, se si Kryetar i Kuvendit i kam dërguar sot një ftesë Kryetarit të PD-së, Lulzim Basha, për t’u takuar me të në çdo kohë që ai e çmon të arsyeshme, në çdo lloj vendi që e gjykon të arsyeshëm apo çdo lloj formati, por deri ditën e hënë, pasi jam i bindur se jemi tashmë të vonuar me kalendarin e reformës për ndryshimet kushtetuese, që nuk është përfshirë deri tani për arsye të mosarritjes së një kompromisi përfundimtar.
Jemi në krizë me kohën dhe duhet të reflektojmë, të lëvizim sa më shpejt që ky proces të zhvillohet në cilësinë e duhur, sipas standarteve të Venecias, por edhe sipas sugjerimeve të EURALIUS dhe OPDAT, që ky proces të gëzojë legjitimitetin dhe integritetin që meriton si kryereformë.
Miratimi i kësaj reforme me cilësinë e duhur dhe integritetin e duhur është shumë e rëndësishme për të rritur besueshmërinë e vendit që të forcojmë argumentat e duhura për të marrë rekomandimet për anëtarsim në BE dhe reforma sa më parë të marrë asistencën e SHBA për të forcuar institucionet e duhura për këtë reformë.”
Para se Meta të dilte me këtë deklaratë në mesditë, paradite në zyrën e tij shkuan Ambasadori amerikan Donald Lu dhe Ambasadorja e BE-së, Romana Vlahutin.
