Komisioni parlamentar i Politikës së Jashtme zhvilloi dje seancë informuese me ambasadorin e Shqipërisë në Greqi, Dashnor Dervishi, i cili theksoi se raportet mes dy vendeve janë shumë dimensionale. Ambasadori Dervishi, në pjesën e parë të mbledhjes me dyer të hapura për mediat, foli për një forcim të marrëdhënieve midis Greqisë, Serbisë dhe Rusisë si kundërpeshë dhe reaksion ndaj aleancës strategjike mes Shqipërisë, Shteteve të Bashkuara të Amerikës dhe Turqisë.
Ambasadori informoi deputetët mbi prapaskenat dhe ulje-ngritjet e marrëdhënieve mes Shqipërisë dhe Greqisë, ndërsa ka pohuar se vitet e fundit është rritur roli i Shqipërisë në rajon dhe në sytë e llogaritë diplomacisë greke. Toponimet, çështja çame dhe ligji i luftës ishin tre nga çështjet për të cilat Ambasadori Dervishi sqaroi Komisionin e Jashtëm parlamentar.
Në lidhje me toponimet, diplomati tha se pala greke kishte kohë që kishte kërkuar ndryshimin e shkrimit në pasaporta, por kjo kërkesë ishte neglizhuar nga autoritetet shqiptare. “Kërkesa është bërë nga pala greke 4 vjet më parë, fqinjët e tjerë e zgjidhën ndërsa ne e neglizhuam. Unë kam qenë edhe para 4 vitesh që e neglizhova, në fund çështja u zgjidh. Zgjidhja u shit në opinionin grek si një favor që Greqia i kishte bërë Shqipërisë, por ishte kërkesë e Greqisë për ne”, tha Dervishi.
Duke u ndalur tek çështja aq shumë e përfolur e paktit detar, Dervishi tha se pas prishjes së paktit detar pati ngrirje në marrëdhëniet, kryesisht nga pala greke dhe pala jonë u përshtat me situatën.“Pasioni i nacionalizmit i futi partitë në grackë, por falë punës diplomatike kemi qëndruar larg incidenteve”, u shpreh Dervishi. Ndërsa për çështjen çame, ambasadori tha që tashmë kjo nuk është më një tabu, por kërkohet shumë më tepër për të gjetur formula të zgjidhjeve të çështjeve. “Duhet theksuar se ka një hap cilësor në marrëdhëniet mes dy vendeve tona.
Në takimet e shumta dhe bisedat e zhvilluara, tezat dhe axhendat janë hedhur në tavolinë dhe janë bërë transparente. Tashmë mund të themi se nuk ka më sekrete mes nesh. Një pjesë e mirë e problematikës është bërë publike dhe përbën pjesën më interesante të analizave dhe debateve publike në masmedia. Në këtë debat nuk ka më rezerva dhe tabu, ç’kishte për tu thënë është thënë. Në qoftë se para disa vitesh vetëm të përmendej fjala “Çamëri” përbënte lajm, tani kërkohet shumë më tepër pasi kemi hyrë në fazën e kërkimit dhe gjetjen e formulave për zgjidhjen e tyre. Jo duke u kapur nga ngjarjet banale që në dy vende fqinj janë të shumta, por duke u nisur nga thelbi i tyre nga shkaqet që i gjenerojnë ato”, u shpreh Dervishi.
