Kryeministri Rama ka hedhur poshtë pretendimet e opozitës për rritje të taksave dhe cmimeve të naftës dhe energjisë. Përmes disa postimeve në Twitter, kreu i Qeverisë pohoi se vetëm ata që dëgjojnë propagandën e demokratëve ankohen për rritjen e cmimeve dhe taksave.
Qytetarët që të shtunën mbushën bulevardin para zyrës së tij, i konsideron viktima të propagandës opozitare. Pretendimet për rritje të taksave dhe cmimeve, sipas Kryeministrit Rama nuk janë të vërteta. Eshtë rritur konsumi dhe jo cmimet, shkruan ai në Twitter. Kush ankohet për të kundërtën, sipas kreut të Qeverisë, dëgjon propagandën e pushtet-humburve.
Dy ditë pas protestës së demokratëve, në replikën e tij virtuale me ta, Rama thekson se 95% e shqiptarëve sot paguajnë më pak taksa se 1 vit më parë. Kush ankohet për të kundërtën është mësuar të mos paguajë asnjë taksë, shpjegon Kryeministri.
Ankohet për cmimin e energjisë kush nuk paguan apo vjedh dritat, këmbëngul Rama. Ai garanton se cmimi i energjisë elektrike nuk do të rritet, ndërsa operacioni kundër hajdutërisë do të ashpërsohet.
Cmimi i naftës sot është më i ulët se vjet dhe nuk do të rritet – vazhdon kreu i ekzekutivit – Kush pretendon të kundërtën, sipas tij, nuk shikon xhepin por SHQUP-in, duke iu referuar deklaratave që vijnë nga selia e Partia Demokratike.
Edhe për ankesat ndaj operacionit të INUK e ka një shpjegim Kryeministri Rama: protestojnë ata që janë mësuar të zënë shesh për përshesh.
Pas 6 postimeve në Twitter i jep fund replikës me opozitën, duke shkruar: “Jemi votuar të bëjmë shtetin e qytetarëve që duan ligj, punë e mirëqënie, jo rrumpallë!” Por formula e tij për të rritur punësimin dhe mirëqënien, nuk funksionon pa respekt për rregullat.
