Për kryeministrin Edi Rama, “reforma në sistemin e drejtësisë, nuk është e një pale, por e të gjithëve” dhe se “sistemi nuk mund të ndryshojë nëse nuk bëhemi të gjithë bashkë”
Aristir Lumezi
Kryeministri Edi Rama tha pak minuta më parë se Shqipëria nuk mund të bëhet anëtare e BE-së me këtë sistem drejtësie, të cilin ai e cilësoi si palë me krimin dhe kriminelët.
Gjatë fjalës së tij në Gjykatën e Krimeve të Rënda, në prani në Presidentit të Komisionit Europian, Barroso, Rama solli ndërmend fjalët që kancelarja Merkel i kishte thënë gjatë vizitës së tij në Berlin lidhur me sistemin shqiptar të drejtësisë.
“Do të mbetet e paharrueshme për mua në takimin me kancelaren Gjermane, kur zonja Merkel më ka parë në sy dhe më ka thënë:
“Dakord Shqipëria mund të jetë kështu si thua ti, mund ta meritojë statusin, dhe ne do ju mbështesim, por dua të më shohësh në sy dhe të më thuash se a do të bëhet Shqipëria me këtë sistem drejtësie anëtare më te drejta të plota në BE? Jo ne nuk mund të bëhemi!”, tha Rama.
Për kryeministrin shqiptar “ne duhet të bëjmë një reformë në sistemin e drejtësisë, që nuk është e një pale, por e të gjithëve, që sistemi nuk mund të ndryshojë nëse nuk bëhemi të gjithë bashkë”.
Zoti Rama e cilësoi drejtësinë shqiptare si primitive.
“Sfida e jashtëzakonshme që kemi të gjithë së bashku për të kaluar nga drejtësia primitive në një drejtësi europiane. Drejtësia sot është problemi më i madh që na identifikojnë edhe në Europës dhe kërkojmë që drejtësia jonë të bëhet pjesë e BE”, tha Rama.
Kreu i qeverisë shqiptare u angazhua për të nisur një reformë të thellë në sistemin e drejtësisë me mbështetjen e BE-së por dhe aktorëve të rëndësishëm ndërkombëtarë në fushën e drejtësisë.
“Kjo reformë është një sfidë që ne do ta fitojmë së bashkë dhe me ekspertizën e BE, Komisionit të Veneçias, Euralius etj. Në një proces që askush nuk do ta bëjë për ne nëse ne nuk e bëjmë për Shqipërinë, krijimin e kushteve që drejtësia të bëjë drejtësi, që drejtësia të mos blihet me para dhe që çekiçi i gjyqtarit të mos jetë një armë për të marrë jetë që falë këtij cekici krimineli të dalë përsëri në rrugë dhe të vijojë me krimet e tij, por çekiçi të bëjë drejtësinë që qytetarët kërkojnë”, tha Rama.
Ai u zotua para kreut të Komisionit Europian se Shqipëria do të arrijë të ketë një drejtësi për të gjithë qytetarët e saj.
“Dua të bind presidentin e KE që drejtësia mund të bëhet në Shqipëri dhe që togat e zeza të mos jenë pjesë e horrave që shkelin ligjin dhe gjejnë mbrojtje tek gjyqtarët duke u bërë dhe bashkëfajtorë në këtë krim. Do ftojmë të gjithë të marrin pjesë në këtë reformë, hapat duhet të jenë të vendosur për t’u shkëputur njëherë e mirë nga kjo situatë ku ndodhemi sot”, përfundoi fjalën e tij Rama.
