Kryeministri i shoqëruar nga ministri i Brendshëm, Saimir Tahiri dhe zëvendësministrja, Elona Gjebrea ka përshëndetur dhe ka takuar një nga një efektivët e policisë
Kryeminsitri Rama i cilësoi forcat e policisë si protagonistë të një historie të re të Policisë së Shtetit. Në fjalën e mbajtur në një ceremoni të organizuar në Pallatin e Brigadave në respekt të forcave policore që u angazhuan në operacionin kundër kultivimit të lëndëve narkotike në Lazarat, Rama i falenderoi ata për punën e vështirë që bëjnë.
“Ajo që bëtë dhe bëni në Lazarat është e jashtëzakonshme. Më vjen keq që kolegë dhe kolege tuaj nuk mundën të jenë sot sepse u duhet të vazhdojnë të jenë në Lazarat. I falenderoj në emër të qeverisë dhe të gjithë shqiptarëve që duan shtet, sepse ju dhe ata që ende janë në Lazarat ia ngritët kokën shqiptarëve. Dëshmuat sesa seriozisht dhe se me cfarë përkushtimi e kemi misionin për ta kthyer Shqipërinë nga një vend i parë me përbuzje në mes të Evropës, në një vend që shihet me respekt dhe zgjon simpati e ngjall interes për mënyrën sesi përballet me të shkuarën për të ndërtuar të ardhmen e vet”, tha Rama.
Duke folur për të ardhmen e Policisë së Shtetit, kryeministri u shpreh se Lazarati nuk duhet kthyer në një kurorë dafinash dhe të ndalet puna me kaq. “Lazarati tregoi se ne mundemi, por jo se kemi arritur aty ku duam të arrijmë. Ne nuk duhet të krahsohemi as me të shkuarën as me të tashmen, por me modelin më të mire të rajonit. 10 vitet e ardhshme duhet ta paraqesim Policinë e Shtetit shqiptar si një ndër policitë më të spikatura të Evropës. Kjo nuk është një utopi. Lazarati tregoi se kjo është plotësisht e mundur”, tha Rama.
Duke folur për marrjen e statusit të vendit kandidat në BE, Rama u shpreh se, “statusi i kandidatit është çertifikata që na garanton të bëjmë detyrat tona. Të zhdukim korrupsionin dhe krimin nga Policia e Shtetit. Që çdo drejtues dhe punonjës i Policisë së Shtetit të jetojë në mënyrë të papajtueshme me korrupsionin”.
“Kjo bëri që aksioni juaj në Lazarat të kishte më shumë tifozë se çdo të ketë për finale e Kupës së Botës. Ajo ishte ndeshja për Shqipërinë siç e duam apo për Shqipërinë siç na kanë detyruar ta pranojmë dhe ju në atë ndeshje treguat se jeni policia për Shqiëprinë siç e duam. Prandaj jini krenarë për atë që bëtë dhe na lejoni të jemi krenarë për atë që bête”, tha Rama.
Ndërsa për ministrin e Punëve të Brendshme, Saimir Tahiri ndërhyrja në Lazarat ka të bëjë me ndryshimin e vullnetit për të bërë shtet. Sipas tij tani banorët e Lazaratit ndihen më të çliruar nga trafikantët.
“BE sot njohu përpjekjet dhe arritjet tona në luftën kundër krimit, trafiqeve dhe korrupsionit. Këto janë momente të rëndësishme për vendin, kanë rimëkëmbur dinjitetin që i takon Policisë së Shtetit shqiptar. U shemb një bunker kriminal në Lazarat që mbante peng një fshat të tërë, dhe dëmtonte imazhin e gjithë vendin. Ishte ngritur nën hundën e shtetit perandoria e Lazaratit. Më kanë pyetur si ndodhi që kjo të ishte në zemër të vendit, dhe askush të mos ndërhynte për gjithë këto vite. Por tani ka ndryshar vullneti. Dhe ne kemi vullnetin për të bërë shtet, për të vendosur sundimin e ligjit”, tha Tahiri.
Drejtori i Përgjithshëm i Policisë së Shtetit, Artan Didi ka falenderuar të gjithë efektivët që morën pjesë në operacionin e Lazaratit. Ai vlerësoi punën e tyre, ndërsa shprehu mbështetje edhe për efektivët që po vijojnë operacionin aty.
“Ky operacion ishte i veçantë. Ndonëse u përballët me breshëri plumbash, ju nuk u tërhoqët. Bashkëpunimi ishte i palodhshëm. Ky operacion nuk ka emra të përveçëm, por ka vetëm emrin e punonjësve të policisë së vijës së parë”, tha Didi.
