Rama dhe Basha bashkojnë sërish votat. Kuvendi ka miratuar me 97 vota pro ndryshimet në ligjin për dosjet e ish-Sigurimit të Shtetit.Ra në sy që nuk pati asnjë votë kundër dhe vetëm 1 abstenim.
Pro nismës votuan deputetët e PS-së dhe grupi i deputetëve të PD-së që drejtohen nga Enkelejd Alibeaj. Përpara votimit që u zhvillua pak para mesnatës ishte i pranishëm edhe ish-kreu i PD-së, Lulzim Basha. Ndërsa deputetët që mbështesin Sali Berishën nuk ishin të pranishëm në sallë.
Drafti i PS-së parashikon t’i japë të drejtë Autoritetit të Dosjeve që të rishikojë dhënien e çertifikatës nëse dalin prova të reja. Me ndryshimin e bërë shfuqizohen vendimet e komisioneve “Bezhani” e “Mezini”. Autoriteti i Dosjeve ka të drejtë të rivlerësojë edhe figurën e zyrtarëve të pajisur me çertifikatë pastërtie.
Projektligji erdhi pas kërkesës së autoritetit pasi papritur i doli një dosje me një spiun të sigurimit me iniciale I.M që sipas autoritit dyshohet se është ish-Presidenti Ilir Meta. Në rast se një zyrtar i lartë rezulton bashkëpunëtor i Sigurimit të shtetit ai largohet nga detyra.
Pjesë e nismës së PS-së u bënë edhe disa propozime të Enkeleejd Alibeajt të dakordësuara më herët me Taulant Ballën. PD kërkonte që të ketë më shumë lehtësi për marrjen e informacionit.
“Çdo person gëzon të drejtën të njihet me dokumentet e ish sigurimit të shtetit dhe të kërkoj një kopje të tyre, në përputhje me ligjin për të drejtën e informimit, me kusht që kërkuesi të paraqesë të dhëna në kërkesën e tij që mundësojnë lokalizimin e informacioneve.
Informacioni jepet vetëm kur angazhimi i nevojshëm për gjejtjen dhe vënien në dispozicion të informacionit është në përpjestim të drejtë me interesin e argumentuar të kërkuesit në marrjen e këtij informacioni, Kërkuesi mban përgjegjësi për keqpërdorimin e informacionit të marrë” – thuhet në amendamentin e PD.
Nga foltorja e Kuvendit, kryeministri Rama nuk e fshehu qëllimin se ligji bëhej kundër Ilir Metës. Ai tha: “larg qoftë të jetë ai I.M. që mendojnë të gjithë”, duke iu referuar kryetarit të Partisë së Lirisë. Kreu i qeverisë deklaroi: Pse nuk vjen këtu Partia e Lirisë që të votojnë. Pse? Për një arsye shumë të thjeshtë, sepse është pikërisht ajo parti bashkë me atë parti që nuk e kanë dashur kurrë hapjen e dosjeve, hedhjen dritë tek hijet sepse kanë dashur që hijet të vijnë vërdallë…Ne jemi këtu që të kujtojmë se në këtë proces na solli shtetasi I.M. Doli një I.M., u mbush dynjaja me fjalë. U pa që nuk merreshe dot vesh se kush është ky I.M. a është ai që u shkon mendja për keq. Është shumë thjesht, u zbulua apo jo që ka një pengesë për shtetasin I.M. Të hapet gjithë kjo kategori dosjesh dhe të lehtësohen të gjithëve”.
