Prokuroria e Shkodrës ka marrë lejen e gjykatës për të vendosur sekuestro preventive mbi 9 pallate në ndërtim në zonën bregdetare të Velipojës. Objektet janë në pronësi të subjektit “Fishta” shpk, me administrator Sait Fishta. Vendimi është marrë për shkak se Fishta dyshohet se ka konsumuar veprën penale të ”Ndërtimit të paligjshëm”.
Prokuroria e Shkodrës ka zhvilluar fillimisht hetime për “shpërdorim detyre” ndaj anëtarëve të Këshillit të Rregullimit të Territorit (KRRT) të Komunës Velipojë, në bazë të të cilave u krijuan dyshime të arsyeshme se 9 zyrtarë, përfshirë edhe ish-kryetarin e komunës Velipojë, kishin dhënë në kundërshtim me ligjin disa leje ndërtimi në favor të “Fishta” shpk.
Në bazë të atij hetimi, KRRT-ja e Komunës Velipojë i kishte dhënë firmës “Fishta” shpk., leje ndërtimi për ngritjen e disa godinave, pjesë e një kompleks turistik. Por, në bazë të veprimeve proceduriale, rezultoi se këto leje ndërtimi ishin dhënë në zonën bregdetare, të cilat duhet të miratohen nga Këshilli Kombëtar i Rregullimit të Territorit (KKRRT).
Për këto shkelje, të gjithë ish-anëtarët e KRRT-së së Komunës Velipojë janë në proces gjyqësor. Ata akuzohen nga Prokuroria e Shkodrës për veprën penale të ”Shpërdorimit të detyrës”.
Gjatë veprimeve hetimore të zhvilluara ndaj ish-zyrtarëve të komunës, të cilët aktualisht janë të pandehur, Prokuroria e Shkodrës njoftoi zyrtarisht edhe administratorin e “Fishta” shpk, shtetasin Sait Fishta, se leja që ai kishte marrë për ndërtimin e kompleksit turistik ishte e paligjshme dhe nuk mund të vijoheshin punimet e nisura për ngritjen e godinave.
Por, nga veprimet e kryera në terren, rezultoi se subjekti “Fishta” shpk, pavarësisht se ishte në dijeni për parregullsitë në lejet e ndërtimit, ka vijuar punimet në këto godina.
Objektet e sekuestruara:
– Dy pallate 6 kate mbi tokë
– Tre pallate në ndërtim, aktualisht në katin e katërt
– Tre pallate në ndërtim, aktualisht në katin e tretë
– Një pallat në ndërtim, aktualisht në katin e parë
Prokuroria thotë se në bazë të lejeve të ndërtimit, godinat planifikoheshin që të ndërtoheshin deri në 6 kate.
