Operacioni
Policia mbështet OSSHE-në në 283 raste: Të arrestuarit, biznesmenë
Në total, Policia e Shtetit arrestoi dje 49 persona në të gjithë vendin, për vjedhje të energjisë elektrike, ku janë verifikuar 283 raste, të cilat ishin sugjeruar nga OSSHE. Në një njoftim për shtyp, Ministria e Brendshme thotë se aksioni është përqendruar në bizneset private, teksa në ditët në vijim do të operohet edhe me qytetarët, të cilët e vjedhin energjinë elektrike. Grupet e përbashkëta po ushtrojnë kontroll të plotë të territorit, duke filluar nga zonat me humbjet më të mëdha në rrjet dhe në çdo rast po kryejnë dokumentacionin për kapjen në flagrancë të vjedhësve të energjisë, duke bërë njëherazi dhe ndërprerjen e lidhjeve të paligjshme.
Vjedhësit
Dje, strukturat e Policisë së Shtetit kanë mbështetur OSHEE-në në 283 raste. Pas kontrolleve të ushtruara deri në orën 19:00 të ditës së djeshme është marrë masa e arrestit në flagrancë ndaj 49 personave, kryesisht pronarë të subjekteve të biznesit, të cilët akuzohen për vjedhje të energjisë elektrike, si dhe janë shpallur në kërkim 7 persona. Nga Drejtoria e Policisë së Qarkut të Tiranës janë arrestuar në flagrancë 21 pronarë të bizneseve të ndryshme, të cilët janë konstatuar që kryenin vjedhje të energjisë, si dhe janë shpallur në kërkim 4 të tjerë, pronarë të subjekteve të biznesit. Nga Drejtoria e Policisë së Qarkut të Fierit janë arrestuar 5 persona, pronarë të subjekteve të biznesit. Nga Drejtoria e Policisë së Qarkut të Lezhës janë arrestuar 6 persona. Ndërkaq, në Durrës, Kukës, Berat, Korçë dhe Dibër është arrestuar nga një person. Nga Drejtoria e Policisë së Qarkut të Elbasanit janë arrestuar 2 persona, në Shkodër u arrestuan 3 persona, në Vlorë janë arrestuar 5 persona dhe nga Drejtoria e Policisë së Qarkut të Gjirokastrës janë arrestuar 2 persona.
Bashkëpunëtorët
Nga strukturat e Policisë së Shtetit, po punohet dhe në drejtim të identifikimit të personave që krijojnë lehtësira për t’u kryer ky aktivitet i paligjshëm, siç mund të jenë punonjës të vetë OSHEE apo ish-punonjës të këtij institucioni, duke marrë dhe masa ndaj tyre. Në këtë kontekst, në të gjitha rastet e konstatimeve të krijimit të lidhjeve të dyfishta të energjisë elektrike për vjedhje apo abuzime të tjera do të kryhen hetime të plota për të identifikuar punonjësin që ka njohuri të posaçme për kryerjen e lidhjeve të tilla, duke filluar procedimin penal. Konkretisht, dje është arrestuar nga Drejtoria e Policisë së Qarkut të Tiranës faturisti Ali Malaj dhe nga Drejtoria e Policisë së Qarkut të Fierit është arrestuar inxhinieri Alban Milo dhe elektricisti Ilir Petani, në akuzën e konsumimit të veprës penale të shpërdorimit të detyrës. Policia e Shtetit thotë se do të vijojë me vendosmëri masat e marra në kuadër të këtij operacioni të rëndësishëm për vendin, duke përballur me forcën e ligjit të gjithë ata persona, të cilët abuzojnë me energjinë elektrike, duke e vjedhur atë, apo duke mos paguar për konsumin që kryejnë, qofshin këto biznese, individë apo punonjës të institucioneve dhe të vetë OSHEE.
Operacioni
Dje, në Tiranë janë arrestuar 21 persona, mes tyre 18 pronarë të bizneseve që vidhnin energjinë elektrike dhe 7 familjare. Në pranga është vënë A.D, pronari i një diskoje në kryeqytet, për lidhje të paligjshme të energjisë elektrike. Ndërkaq, edhe M.K, pronar lavazhi, A.H pronar i një mobilierie, L.B pronar ndërtimi dhe K.LL pronar i një servisi, janë arrestuar. Në total janë 6 komisariate të përfshira në këtë operacion, ku u verifikuan të paktën 80 biznese. Në disa raste, pronarët e bizneseve, që kanë vjedhur energjinë, janë larguar, sapo kanë parë punonjësit e OSSHEE dhe të policisë. Në Fier janë ndërprerë 103 lidhje të jashtëligjshme, teksa OSSHE ka mbledhur 190 milionë lekë nga shlyerja e detyrimeve e pohuar nga drejtori i OSHEE në Fier, Arjan Fasko, i cili shton se “Ka një fluks të madh debitorësh për të paguar faturat e energjisë elektrike”. Aksioni në Fier u finalizua me ndërprerjen e energjisë për 103 abonentë, 9 prej të cilëve u ndaluan në flagrancë teksa vidhnin energjinë elektrike. Ndërkaq, në Korçë janë kryer 300 ndërprerje, ku 20 për qind janë biznese dhe pjesa tjetër familjarë, e konfirmuar nga Agim Pili, drejtor i OSHEE për Korçën. Nga ana tjetër, në Elbasan aksioni ka nisur nga rruga e Universitetit ku janë përqendruar edhe një numër i madh biznesesh dhe deri tani 168 raste të vjedhësve të energjisë kanë përfunduar në prokurori.
Plani
Tahiri dhe Gjiknuri, takim me 12 drejtorët e policisë
Për të analizuar të gjithë operacionin e zhvilluar dje në të gjitha rrethet e vendit, ministri i Brendshëm, Saimir Tahiri, ka thirrur në një mbledhje urgjente 12 drejtorët e policisë në qarqe dhe 12 drejtorët e Operatorit të Shpërndarjes së Energjisë Elektrike. Nga burime të Ministrisë së Brendshme mësohet se në këtë takim ka qenë i pranishëm edhe ministri i Energjisë dhe Industrisë, Damian Gjiknuri. Nga ana tjetër, mësohet se në takimin që ka përfunduar rreth orës 20:30 të mbrëmjes së djeshme është diskutuar rreth koordinimit të mëtejshëm të aksionit kundër vjedhjes së energjisë elektrike. Para pak ditësh, Kryeministri Edi Rama dha një afat të shkurtër për të gjithë vjedhësit e energjisë elektrike, teksa dje Policia e Shtetit në bashkëpunim me Operatorin e Shpërndarjes së Energjisë Elektrike ka nisur aksionin në të gjithë vendin, ku në pranga kanë rënë 52 persona, mes të cilëve 3 punonjës të OSHEE dhe 49 shtetas që përfaqësojnë bizneset e tyre. Ndërkaq, gjatë takimit të djeshëm, Tahiri dhe Gjiknuri, në prani të drejtorëve të policisë dhe të OSSHE-së, përcaktuan objektivat e radhës, ku janë evidentuar vjedhje masive të energjisë elektrike, ku kryesisht këto raste kanë të bëjnë me biznese të cilët kanë kryer lidhje të paligjshme, kanë detyrime të prapambetura apo vijojnë të vjedhin energji elektrike. Sakaq, në ditët në vijim pritet që aksioni të shtrihet edhe te konsumatorët e thjeshtë.
Paralajmërimi
Gjiknuri: “Debitorëve do t’u ndërpritet energjia”
“Qytetarët që janë debitorë do t’ju ndërpritet energjia dhe ata që do të tentojnë ta rilidhin energjinë, pa autorizimin e korporatës, do të kryejnë një krim penal, sepse është ndërhyrje e paligjshme në rrjet”, këtë mesazh e lëshoi dje ministri i Energjisë dhe Industrisë, Damian Gjiknuri, i cili së bashku me Administratorin e OSHEE-së, Arben Seferi, ndoqën nga afër aksionin e Operatorit të Shpërndarjes dhe Policisë së Shtetit në autostradën Tiranë-Durrës. Lidhur me mundësinë e pagesës me këste nga personat që nuk kanë mundësi të paguajnë, Gjiknuri u shpreh: “E rëndësishme është që qytetarët që nuk kanë paguar energjinë ta paguajnë atë. Të shkojnë në zyrat e kompanisë së Shpërndarjes, të kërkojnë edhe mundësi të pagimit pjesor sipas mundësive që ka shoqëria”. Edhe me ndryshimet që kemi bërë në Kodin Penal, tha Gjiknuri, synimi ynë primar ka qenë ai grup që e vjedh energjinë elektrike për qëllime fitimi. “Abuzimi është i shtrirë në shumë drejtime, ka edhe abonentë familjarë të cilët abuzojnë, por e kemi filluar nga bizneset, do të vazhdojmë edhe me qytetarët e tjerë”, u shpreh Gjiknuri. Duke iu përgjigjur kritikave të opozitës, Gjiknuri tha se kjo është një betejë për ata që paguajnë, kjo është një betejë për stabilitetin e çmimeve të energjisë elektrike. “Pa këtë betejë për jetë a vdekje për sektorin energjetik, vendi do të kalonte në një kolaps financiar. Sektori nuk mund të akumulojë dhe përballojë më humbjet e abuzimit me energjinë”, paralajmëroi ministri Gjiknuri.
OSHEE
Seferi: Operacioni, i fokusuar te bizneset
Në një deklaratë për shtyp, drejtori i Policisë së Tiranës, Ardian Çipa dhe drejtori i OSSHE-së, Arben Seferi, tha se të gjithë komisariatet e Policisë së Tiranës kanë qenë në terren së bashku me punonjësit e OSSHE. Sipas Çipës, operacioni u shtri në disa zona të kryeqytetit, të evidentuara më parë si zona problematike në drejtim të abuzimit me energjinë elektrike. Administratori i OSHEE, Arben Seferi, theksoi se operacioni është fokusuar te bizneset dhe jo te konsumatorët e thjeshtë. Ai bëri me dije se operacioni do të vijojë deri në eliminimin e këtij abuzimi. “Është bërë kapje në flagrancë të 21 bizneseve. Nuk jemi marrë me popullin, por me hajdutët e energjisë që e vjedhin energjinë për fitim. Pra, operacioni nuk është i fokusuar te abonenti familjar, por te bizneset”, theksoi Seferi.
