Kryeministri kërkon që ndërkombëtarët t’i dalin për zot garantimit të marrëveshjes
Kryeministri Edi Rama shtroi një darkë iftari, ku ishin të pranishëm ministra, deputetë dhe shumë personalitete të fushave të ndryshme. Në fjalën e tij përshëndetëse, kreu i ekzekutivit theksoi se “iftari nuk bashkon në sofër vetëm myslimanët në vendin tonë, por edhe të krishterët me myslimanët”, duke shtuar se “shqiptarët janë europianë me fe të ndryshme. E tillë është dhe Kosova dhe mos qoftë e thënë të lëkunden ndonjëherë. Por ndërkohë, më lejoni ta them, të tjerët miqtë dhe partnerët tanë nuk duhet ta harrojnë se palëkundshëmria e shqiptarëve si Evropianë pa dallim fesh dhe vendbanimesh, vjen prej një besimi që nuk ushqehet veç me fjalë dhe me ëndrra në këtë botë lëkundjesh nga të katër anët”. Duke folur për trazirat në Maqedoni, Kryeministri Rama, në fjalimin e tij tha se ajo që po ndodh është pasojë e faktit që Marrëveshja e Ohrit nuk po zbatohet në mënyrë të plotë. Kryeministri Edi Rama e ka cilësuar mosrespektimin e Marrëveshjes së Ohrit si arsyen kryesore të përplasjeve të fundit në Maqedoni. Ai theksoi se Marrëveshja e Ohrit kishte garant edhe faktorin ndërkombëtar, kështu që të tria palët që hynë garant, ajo shqiptare, maqedonase dhe faktori ndërkombëtar duhet të reflektojnë. “Çka po ndodh këto ditë në Maqedoni meriton vëmendje, maturi pa dyshim, po reflektim dhe madje të thellë po ashtu. Marrëveshjes së Ohrit nuk i kanë dalë për zot vetëm dy palët që e përbejnë Maqedoninë, maqedonasit dhe shqiptarët, por edhe garantët e asaj marrëveshjeje, miqtë dhe partnerët e besuar ndërkombëtarë. E nëse maturia u duhet shumë dy palëve tona, reflektimi i thellë nevojitet të jetë trepalësh, pasi as burgosja e përjetshme e 6 shqiptarëve, as reagimi me flamuj të një radikalizmi fetar që i bie ndesh interesave shqiptare, nuk mund të justifikohen. Por këto janë pasoja të moszbatimit të plotë të Marrëveshjes së Ohrit dhe një humbjeje besimi ndër shqiptarët, për të cilat garantët nuk duhet ti kërkojnë të gjitha shkaqet jashtë sferës së përgjegjësive të tyre”, – u shpreh Rama. Më tej, ai shtoi se: “ashtu sikundër besoj unë edhe flamujt e radikalizmit fetar nuk ngrihen mbi shkopinj, por mbi plagë sociale gërryese, varfërim, papunësi, keqarsimim dhe izolim, të cilat shkaktojnë reaksione nga më agresivet në organizmin shoqëror të një bashkësie. E për këto duhet menduar me tre palë për Maqedoninë. Për këto duhet menduar me shumë palë për Ballkanin”.
Protesta në Tiranë dhe qytetet e tjera të Shqipërisë
“Dhuna të marrë fund, jemi 10 milionë shqiptarë”
Dhjetëra e qindra të rinj u mblodhën para Piramidës për të protestuar në mbështetje të shqiptarëve të Maqedonisë. Protesta ishte lajmëruar në rrjetet sociale, menjëherë pas dhunës që policia maqedonase ushtroi ndaj shqiptarëve protestues në Shkup.
Një nga parullat e hapura në protestë ishte dhe ajo “Shkupi, zemra e Shqipërisë”. Protestë e ngjashme u mbajt dhe në Prishtinë dhe në qytete të tjera shqiptare. I pranishëm në protestën e Tiranës ishte edhe kampioni i boksit, Nuri Seferi, i cili bëri thirrje që dhuna ndaj shqiptarëve të marrë fund. “Dhuna ndaj shqiptarëve duhet të marrë fund. Ne jemi popull paqedashës dhe nuk nxisim urrejtjen”- tha Seferi, i cili ishte i mbështjellë me një flamur kuqezi. Më tej ai shtoi se “i bëj thirrje Maqedonisë, boll me këto maltretime që i bëni kombit shqiptar, se populli shqiptar ka 10 milionë shqiptarë bashkë. Të mbledhin mendjen se nuk do të rrimë duarkryq, jemi popull paqedashës, por në rast se na imponohet diçka ndryshe, jemi të detyruar të veprojmë e reagojmë”. Protestuesit që morën fjalimin atje u shprehën se “nuk bëhet fjalë për rastin e fundit “Monstra”, bëhet fjalë për tentativën e shtetit maqedonas që të dënojë një etni të tërë pa fakte. Shqiptarët e Maqedonisë të mos klasifikohen si një grup radikal fetar, por të respektohen. Protestat do vazhdojnë, nuk kanë organizues të veçantë, janë rrjete sociale që thërrasin njëri-tjetrin deri në sensibilizimin e qeverisë sonë, Maqedonisë, Kosovës. Duam diplomaci intensive që shqiptarët të mos keqpërdoren kudo janë. Shteti shqiptar t’u dalë zot dhe të respektohet Marrëveshja e Ohrit”.shqip
