Parlamenti Europian ka zgjedhur sot me shumicë votash Jean-Claude Juncker në krye të Komisionit Europian. Ish kryeministri i Luksemburgut pason në këtë post spanjollin Jose Manuel Barroso.
I propozuar nga Partia Popullore Europian, Juncker ka marrë 422 vota pro nga 729 deputetë të pranishëm në sallë. Pavarësisht kundërshtimit të fortë nga Mbretëria e Bashkuar dhe kryeministri David Cameron, 59 vjeçari me mbështetjen e Berlinit ka mundur të zgjidhet në krye të KE-së pas aprovimit që mori më parë nga shumica e liderve të BE-së.
Jean-Claude Juncker konsiderohet si një federalist dhe ka mbështetur dhënien e më shumë kompetencave institucioneve të Brukselit në raport me qeveritë vendore. Në fjalën e tij pas votimit ai është shprehur se Komisioni Europian nën drejtimin e tij do të jetë një “trup politik” dhe jo thjesht një “shërbim civil”. Juncker ka mbrojtur gjithashtu edhe monedhën e përbashkët,euro, duke e konsideruar atë si mbrojtëse të Europës.
Vendimi për zgjedhur Juncker në krye të KE ka shkaktuar debat të madh në Londër aq sa vetë kryeministri David Cameron ka deklaruar se Britania do të rishikojë marrëdhëniet e saj me Brukselin. Cameron ka premtuar edhe mbajtjen e një referendum popullor në vitin 2017 në rast se ai fiton zgjedhjet, për vendosur nëse Britania e Madhe do të vazhdojë ose jo të qëndrojë brenda unionit europian.
