Basha: Fëmijë pushtetarësh lëvizin të armatosur pa frikën e policisë
Ka qenë i ashpër reagimi i demokratëve për masakrën e ndodhur dje në mëngjes në Tiranë, ku mbetën të vrarë katër persona dhe që dyshohet të jenë shkaktuar nga një person i vetëm, Kostandin Xhuvani, djali i deputetes socialiste, Luiza Xhuvanit. Vetëm pak minuta pas konferencës së përbashkët në Kryeministri, duke e përshëndetur aktin e dorëheqjes nga mandati i saj si deputete në Kuvendin e Shqipërisë, kreu i grupit parlamentar të Partisë Demokratike, Edi Paloka, u shpreh se përgjegjësia morale dhe politike për këtë krim është vetëm e kreut të mazhorancës Edi Rama. “Dorëheqja si deputete e mamasë së autorit të krimit këtë mbrëmje, është një gjest për t’u vlerësuar, ndonëse mbarë opinioni publik e kërkonte këtë me ngulm gjatë gjithë ditës. Por është e refuzueshme deri në neveri melodrama e shpifur e luajtur nga Edi Rama, i cili rreket të bëjë demagogji, dhe të lajë duart nga përgjegjësia e rëndë morale dhe politike që është sot dhe gjithë ditën e tija dhe vetëm e tija për këtë vrasje të paralajmëruar”, – tha Paloka. Duke vijuar më tej, Paloka deklaroi se krimi nuk do të ndodhte nëse vrasësi s’do të kishte mbrojtjen e Edi Ramës. “Nëse Edi Rama nuk do t’i bëhej mburojë recidivistit të dënuar për vrasje, atëherë krimi i sotëm mund të ishte evituar”, – u shpreh Paloka. Lidhur me masakrën e mëngjesit të djeshëm në Tiranë, ku mbetën të vrarë katër persona ka reaguar edhe shefi i selisë blu, Lulzim Basha, i cili kërkoi barazi para ligjit. “Krimi ka hyrë nën petkun e qeverisë. Të gjithë duhet të jenë të barabartë përpara ligjit dhe duhen gjykuar njësoj”, – u shpreh Basha. Kreu i demokratëve tha se është pikërisht kriminalizimi i Parlamentit, që nuk i lë hapësira opozitës për t’u kthyer në Kuvend. “Sot është faktuar më së miri se krimi ka gjunjëzuar policinë dhe shtetin. Fëmijë pushtetarësh lëvizin të armatosur pa frikën e policisë që merret me gjithçka përveç rendit dhe sigurisë. Rama i ka hapur luftë çdo qytetari të këtij vendi, por jo kriminelëve që ai vetë i ka promovuar në Parlament, në administratë dhe kudo”, – tha Basha. Përmes deputetit të saj Gent Strazimiri, PD-ja ia ka ngarkuar si përgjegjësi qeverisë shqiptare, teksa denoncoi lehtësitë që, sipas tij, i krijohen krimit e bandave, dhe represionin e dhunshëm policor ndaj qytetarëve të pafajshëm. “Kryeministri dhe banda e tij kanë krijuar të gjitha lehtësitë për autorin, djalin e deputetes Xhuvani, që të lëvizë i lirshëm me armë në brez, madje të krijojë edhe një bandë kriminale dhe ta ushtrojë aktivitetin me shantazhe, gjobëvënie e vrasje në mes të Tiranës”,- tha Strazimiri. Ndërsa në një postim në faqen zyrtare në “Facebook”, ish-kryeministri Sali Berisha shkruan se Tirana u gdhi e përgjakur nga një bandë qeveritare. “Rama sot nuk mund të shprehte ngushëllime dhe të kërkonte ndjesë katër familjeve në zi, sepse Xhuvanët nuk janë të vetmit, por si ata janë dhjetëra e dhjetëra të tjerë në Parlamentin dhe maxhorancën aktuale që përdorin pushtetin si mburojë për vrasjet, trafiqet dhe përdhunimet e tyre. Rama shprehu admirimin deri në adhurim për Xhuvanët (prindër artist), por nuk gjeti një fjalë të vetme për të dënuar aktin e Xhuvanit vrasës serial, që hapi katër varre në katër zemra dhe shpirtra nënash dhe baballarësh vetëm e vetëm se ata i vrau Kostandini i pushtetit. Qytetare, Rama është kreu i meduzës së krimit në Shqipëri. Qëndrimi juaj është vendimtar për rendin publik, sigurinë e jetës, pronave dhe veprimtarisë tonë”, – tha Berisha.
