Nga Bashkim Metalia
Teksa “fuçia e barutit” po transportohet sa në një vend në një tjetër të Ballkanit, habitesh nga fakti se shpura politike e saj, nuk e kupton se po tërbohet lehtësisht për t’i dhënë shkëndijën e shpërthimit. Padyshim, të parët që do përfshihen në flakët e saj janë vetë ata.
Nuk e kuptojnë se shërbejnë thjesht si dordolecë të leckosur moralisht dhe politikisht duke u arsyetuar dhe shfajësuar në “implementimin e standardeve evropiane”. Por ajo që nuk arsyetohet dhe logjikohet është se po sharrojnë degën që janë ulur.
Thuhet shpesh se aksh shtet është projekt i krijuar , diku, dhe dhuratë nga fuqitë e mëdha , thjesht e thjesht për të kënaqur ambiciet e njërës apo tjetrës fuqi. Kur është fjala për Ballkanin këto trofe të hershme i kanë përdorur pa u kursyer duke damkosur kombe dhe etni dhe rrjedhimisht , pasojat sa vijnë dhe kristalizohen dita-ditës.
Evropa e Vjetër po mundohet të çirret nga të palarat e kohës dhe po përpihet të dalë nga “vetvetja” për të ndrequr atë çka e krijoj.
Molla e sherrit në telashet e Ballkanit shpesh e konsiderojmë Serbinë.
Harrojmë, (së bashku me Serbinë) që molla reale e sherrit , për arsye gjeo-politike, i ka rrënjët nga stepat dhe që po vallëzon mbi fatet e kombeve të tjera ballkanike dhe më së shumti mbi kombin shqiptar.
Duke parë prirjen e re botërore , globalizmin; zhvillimin dhe arritjet teknologjike, njerëzimi po kërcënohet me të gjitha metodat, klasike dhe ato të kohës me sulme kibernetike dhe jo vetëm.
Perëndimi e ndjen dhe e ka ndjerë këtë kërcënim, mirëpo po përparon dhe dështon në të njëjtën kohë!
Infiltrimet destabilizuese në Ballkan nuk kanë munguar asnjëherë!
Të gjitha këto si mos bërja e funksionimit të shtetit të së drejtës, përveç korrupsionit të brendshëm, dorë të fortë kanë luajtur edhe këto mekanizma të jashtëm ruso-sllav në Ballkan.
Edhe pse me hapat e breshkës perëndimi , deri diku ka bërë aq sa ka mundur dhe dëshiruar, për të kthyer të drejtën e vetëvendosjes në popujt dhe kombet e këtij gadishulli të trazuar.
Maqedonia, një nga këto projekt- krijesa të pasluftërave botërore po e vuan së fundmi më së shumti që të zgjidhet përfundimisht pozicioni i saj pse jo dhe (mos)ekzistenca e saj.
Por edhe këtu Rusia ka planet e saj plëngprishëse, paçka se u shkon përshtat edhe klikës sllavo-maqedonase për të qeverisur dhe shtypur bashkëqytetarët e saj me kombësi shqiptare.
Bashkëjetesa mes shqiptarëve dhe Maqedonasve sa vjen dhe po shkërmoqet , paçka se shqiptarët kanë duruar deri në ekstreme kryqëzatën shtetërore sllave, në dëm të të drejtave dhe lirisë së tyre. Diskriminimi njerëzor që ka bërë dhe vazhdon të bëjë shpura sllavomaqedone ndaj shqiptare ka arritur kulmin ( duke mos harruar Kumanovën … dhe jo vetëm) tashmë i është vërsulur të ashtuquajturit tempullit të saj të demokracisë.
Turma huliganësh, me dhe pa maska, rrahën gati deri në vdekje deputetët shqiptarë pa drojën më të vogël, paçka se e dinin që po filmoheshin nga kamerat televizive.
I gjithë ky mllef nëse do ta quajmë të tillë është, zgjedhja në kryesinë e kuvendit të një shqiptari, Zotit Talat Xhaferi.
Deputeti dhe lideri Partisë shqiptare Besa Zoti Zijadin Sela ishte synimi kryesor për ta dëmtuar, duke përfunduar në spital pa ndjenja, i përgjakur dhe i plagosur në shumë vende të trupit të tij.
Policia jo vetëm që nuk i parandaloj huliganët por ndërhyri me vonesë për të mos ndodhur ky turp shtetëror. Drejtori i i Byrosë për Siguri Publike Mitko Cavkov deklaroj për mediat lokale se i është dashur dy orë për të mbledhur police që të ndërhynte për të stabilizuar situatën. Aspak aluduese, pasi deputetë dhe anëtarë të Partisë së Gruevskit shihen në ekranet televizive, pasivë në veprime por shumë aktivë në organizimin dhe orientimin e turmës së huliganëve si jashtë dhe brenda parlamentit.
I dëmtuar nga goditjet mbeti dhe lideri i opozitës Maqedone Zoran Zaev.
Menjëherë ambasadorët e vendeve perëndimore bënë thirrje për vetëpërmbajtje dhe ulje të gjakrave, dhe se forcat e rendit duhet të ndërhyjnë që të garantojnë rendin dhe qetësinë publike.
Zëvendës ndihmësi i Sekretarit Amerikan Hoyt Brian Yee bëri një vizitë të menjëhershme me aktorët politik në vend si Gruevskin, Ivanov dhe Z. Talat Xhaferi , këtij të fundit i uroj detyrën e re.
Gruevski në njëfarë mënyre e pranon (natyrisht padashje) se është pikërisht provokimi që ju bë maqedonasve duke kënduar himnin shqiptar nga deputeti i Lëvizjes Besa, Zoti Zeqirja Ibrahimi, në parlament menjëherë pasi u zgjodh Kryetar i Parlamentit Zoti Talat Xhaferi.
Siç ndodh rëndom me një ngrehje veshi, tashmë, disi duken të zbutur, sidomos Presidenti Ivanov duke i hapur dritën jeshile Liderit të opozitës që të formoj qeverinë.
Ish kryeprokurori Publik, Marko Zvërlevski është shprehur se Ivanov dhe Gruevski janë përgjegjësit për nxitje të dhunës në Maqedoni.
Kaosi i kësaj situate nuk është se filloj aty dhe vetëm atë natë , dhuna dhe torturat mbi shqiptarët janë simboli i sllavo maqedonase, dhe natyrisht duke ditur të flasin vetëm këtë gjuhë , nuk mund ta përpijnë që tashmë shqiptarët të jenë edhe ata në pozitat drejtuese të shtetit.
Nuk e konceptojnë që shqiptarët duhet të kenë po aq të drejta sa ata vetë.
Kështu i ka trajtuar/mësuar historia, kështu ua ka këshilluar/edukuar pse jo dhe Nëna Rusi.
Por Maqedonët harrojnë se përpjekja për të penguar që të bashkëqeveriset me shqiptarët, duke inskenuar situata të tilla, do të përfundojnë të vetëm dhe pa emrin e pagëzuar , dhe mesa duket, nëse vazhdojnë akoma me inskenime të tilla, fuqia e barutit do u plasë në duart e tyre!
