Pas kryebashkiakut të Gjirokastrës, Flamur Bime, edhe kryetar i bashkisë së Peshkopisë, Ilir Krosi do të vihet nën hetim për shpërdorim detyre. Kjo, pasi Inspektorati Kombëtar i Mbrojtjes së Territorit e kallëzoi në Prokurori për lejimin e ndërtimeve të paligjshme në të paktën 7 raste në territorin e kësaj bashkie. Po me akuzën e shpërdorimit të detyrës u dorëzua kallëzim edhe për kryeinspektorin aktual të Inspektoriatit të Mbrojtjes së Territorit të Bashkisë Peshkopi, Gafur Gazidede si dhe dy ishkryeinspektorët e këtij inspektoriati, Halil Zhuka dhe Dilaver Drizi.
“Janë të paktën shtatë raste, kur këta shtetas nuk kanë vepruar sipas parashikimeve ligjore në fuqi, për ndalimin e punimeve të kundërligjshme të kryera në territorin e bashkisë së Peshkopisë, duke shkaktuar me mospërmbushjen e detyrimeve të tyre ligjore, dëmtimin e territorit”, thuhet në njoftimin e IKMT-së. Sipas kallëzimit që Inspektoriati në varësi të Ministrisë së Brendshmë ka dorëzuar në organin e akuzës, kryetari i Bashkisë Ilir Krosi, jo vetëm nuk ka marrë masa për të parandaluar ndërtimet pa leje, por as nuk ka kryer kontrolle në terren përmes Inspektoriatit të Mbrojtjes së Territorit në këtë Bashki.
“Nga kryeinspektori dhe paraardhësit e tij të kallëzuar, nuk janë marrë masat përkatëse për parandalimin e këtyre punimeve të kundërligjshme, duke mos vazhduar procedurat ligjore dhe duke mosrespektuar afatet për zbatimin e vendimeve të marra. Ndërsa nga ana e kryetarit të bashkisë, si Autoriteti i vetëm i Planifikimit në këtë bashki, nuk është marrë asnjë masë konkrete ligjore për të parandaluar ndërtimet e kundërligjshme, për të kryer kontrollin e zhvillimit të territorit dhe për të kryer drejtimin e zhvillimit të territorit”, thuhet në njoftimin zyrtar të IKMT-së. Në përfundim, IKMT i kërkon institucioneve të drejtësisë që të marrin masa për pezullimin nga detyra të kryebashkiakut Krosi dhe Kryeinspektorin Gafur Gazidede, porsa kohë janë në hetim për “shpërdorim detyre”.
Pas akuzave për shpërdorim detyre, kreu i Bashkisë së Peshkopisë, Ilir Krosi ka folur për mediat duke sqaruar se nuk ka asnjë dijeni për kallëzimin e bërë nga IKMT dhe se lajmin e ka marrë vesh nga mediat. Krosi tha se ai nuk e ka shkelur ligjin dhe është gati për çdo ballafaqim të mundshëm. Po ashtu kreu i bashkisë tha se edhe punonjësit e tjerë të institucionit të cilët janë të përfshirë në këtë akuzë janë të gatshëm që të përballen me çdo shkallë të drejtësisë. Akuzat për shpërdorim detyre Krosi i ka quajtur të pabaza dhe sipas tij kanë ardhur në një moment të trazuar politik, për këtë arsye ai ka shpallur edhe kandidaturën e tij për mandatin e katërt në Peshkopi.
“Ky moment është i trazuar poltikisht media po pompohen çdo ditë me lajme të tilla që rezultojnë tollumbace. Ndërtimet janë bërë mbi bazën e lejeve të ndërtimit mbi që janë dhënë konform kritereve ligjore”- tha Krosi. Përsa i përket lejeve të ndërtimit kreu i bashkisë së Peshkopisë, tha se prej katër vitesh bashkia që ai drejton nuk ka dhënë asnjë leje. Lidhur me zgjedhjet e ardhshme vendore, Krosi ka sqaruar se do të rikandidojë për zgjedhjet e ardhshme duke pretenduar kështu një mandat të katërt. Akuzat ndaj tij Krosi i quajti si një tentativë për të njollosur emrin e tij në media në mënyrë që ta bëjnë atë të tërhiqet.
Bime: Do vërtetoj të kundërtën
Kryetari i Bashkisë së Gjirokastrës Flamur Bime është treguar i hapur për hetimin që ka nisur ndaj tij pas kallëzimit që Inspektoriati Kombëtar i Mbrojtjes së Territorit i bëri në Prokurori për dhënien e lejes së paligjshme të një pallati 7 katësh. Madje sipas tij fakti që IKMT ka nisur kontrollet në qytetin e Gjirokastrës është tregues se shteti po funksionon. Në një konferencë për mediat një ditë pas kallëzimit ndaj tij, Bime tha se do të vërtetojë me fakte dhe argumente se nuk ka kryer asnjë shkelje në dhënien e lejes ndërtimore gjatë kohës që ka qenë në krye të KRRT-së. “Më në fund Inspektorati Kombëtar i Mbrojtjes së Territorit me kërkesën time erdhi dhe në Gjirokastër.
Kallëzimi tregon se shteti ligjor funksionon. Me dokumente, fakte, argumente, ne do të vërtetojmë që kallëzimi nuk qëndron. Ne jemi të hapur për të bashkëpunuar dhe në dispozicion të Prokurorisë dhe të gjithë organeve ligjzbatuese. Ne dhe në rastin konkret, por dhe gjithë udhëheqjen dhe qeverisjen e shërbimit në Bashkinë e Gjirokastrës jemi udhëhequr nga ligji dhe vetëm nga ligji”, – u shpreh Bime. Sipas tij në ditët në vijim do të ketë të tjera fakte që plotësojnë dokumentacionin ligjor që provon punën dhe aktivitetin e bashkisë e mbështetur mbi rregullat e legjislacionit në fuqi. I gjithë ky dokumentacion sipas Bimes është i hapur për IKMT dhe prokurorinë. Ndërkohë, kryebashkiku Bime nuk ka dashur t’i përgjigjet intersimit të gazetarëve nëse do të rikandidiojë qoftë edhe si i pavaruar në zgjedhjet lokale të qershorit.
IKMT kallëzoi kryebashkiakun e Gjirokastrës duke iu referuar një vendimi të miratuar prej tij në kohën kur drejtonte KRRT. Bëhet fjalë për një leje për ndërtimin e një pallati 7 katesh në lagjen “18 shtatori”, që në kundërshtim me çdo të dhënë urbanistike dhe të ligjeve është lejuar një shtesë prej 5 katesh. Vendimet janë dhënë pa pasur më parë dhe pa u bazuar në asnjë plan rregullues dhe asnjë studim urbanistik pjesor të miratuar sipas ligjit. IKMT kallëzoi po ashtu edhe Kryeinspektorin dhe inspektorët e IKMT të bashkisë Gjirokastër, Ilir Çumaku ish-sekretar i KRRT, Antoneta Çako ishsekretare e KRRT, si dhe ish-anëtarët e Sekretariatit Teknik të KRRT.
