Qeveria e Kosovës ka shtrënguar masat kufizuese në përpjekje për të ndalur rritjen e infeksioneve nga Covid, të shkaktuara nga varianti i ri Omicron, që ka prekur vendin.
Në mbledhjen e mbajtur këtë të premte, Qeveria ka vendosur zgjatjen me dy orë të orarit të ndalimit të lëvizjes nga ora 22:00 deri në orën 05:00. Deri më tani, kufizimet nisnin në mesnatë duke përfunduar në orën 05:00 të mëngjesit.
Sa u takon masave të tjera, mbeten në fuqi ato ekzistueset, që nga mbajtja e maskës në ambiente të mbyllura, distancimi fizik dhe detyrimi për certifikatë sigurie për personat që hyjnë në vend.
Kosova ka raportuar rritje të fortë rastesh të reja në ditët e fundit, ku shifrat ditore kanë qenë mbi 500 vetë të infektuar.
Gjithsesi, numri i të shtruarve në spital dhe pacientët në gjendje të rëndë ka një rritje të ulët në krahasim me valën që goditi vendin në muajt gusht e shtator të vitit të kaluar.



















