Dirigjent? Mbase nuk e kishte menduar kështu. Ishte pjesë e botës muzikore, i rrethuar në çdo moment nga muzika. I magjepsur nga muzika klasike, Olsi Qinami, nuk donte të ishte thjesht një “dëgjues” i mirë, apo shijues apasionant i saj.
Fillimet e karrierës së tij dhe udhëtimi në profesionin e tij zë fill me studimet e pianos në moshën 6 vjeçare në Tiranë në shkollën e muzikës Servete Maçi (dikur quhej Kongresi i Përmetit) me Etleva Krantja (gruaja e dirigjentit të famshëm Ermir Kranjta).
Më vonë vazhdoi studimet e pianos në Liceun Artistik të Tiranës “Jordan Misja” me Etleva Turkeshin dhe Iris Kapon.
Deri atëherë kontakti i vetëm që ai kishte me instrumentet të tjerë, ishte nga bashkëmoshatarët e tij që luanin në piano, violinë dhe violonçel . Kur kishte mundësi dëgjonte repertor simfonik në Radio Televizionin Shqiptar dhe radio po ashtu .
Rreth moshës 12-13 vjeç për herë të parë Olsi shkoi me vëllain e tij cili është muzikant gjithashtu, në një koncert në Tiranë me Orkestrën Simfonike të Radio Televizionit Shqiptar, ku ai e përshkruan si një eksperience të mrekullueshme që nuk e harron kurrë.
Për të , të dëgjonte një orkestër direkt për herë të parë ishte mahnitëse. Është e vështirë për ta shpjeguar ndjesinë, por papritur ai zbuloi që ka një botë muzikore më të madhe se piano me shumë tinguj të ndryshëm, ngjyra, dhe ritme që nuk i gjen dot në një instrument të vetëm. Ky ishte impakti i tij i parë me muzikën orkestrale dhe këtu filloi dëshira e tij për tu angazhuar dhe për të bërë diçka me orkestër. Me sugjerimin dhe mbështetjen shumë të madhe të Prof Thoma Gaqit dhe Prof Roland Çene vendosi të studiojë për dirigjim në Akademinë e Arteve në Tiranë (Sot Universiteti i Arteve) me Prof. Bujar Llapaj dhe Petrika Afezolli.
Vitet në Akademinë e Arteve në Tiranë, mësimet dhe takimet me shumë profesorë dhe kolegë kanë qenë shume të rëndësishme për zhvillimin e tij si muzikant.
Ka zgjedhur Britaninë si vendin që ka vendosur të qëndrojë, pasi e sheh si një shtet që mirëpret njerëz nga vende të ndryshme të botës dhe i jep mundësi të barabarta të gjithëve.
Ka udhëtuar në disa vende të Evropës për specializime në degëne dirigjimit si UK, Itali, Austri ku ka studiuar me dirigjentë shumë të njohur si Howard Williams, Jorma Panula, Mark Heron, Achim Holub, Peter Stark, Neil Thomson etj. Në France është diplomuar për Dirigjim nga konservatori prestigjoz “Ecole Normale de Musique de Paris” nën drejtimin e Dominique Rouits dhe momentalisht po mbaron Diplome Superiore nga i njëjti konservator. Në Tetor të 2015 ka fituar çmimin e dytë në një konkurs internacional Dirigjimi në Londër.
Si çelës të suksesit te tij vlerëson punën, vendosmërinë për të arritur më te mirën, njohjen dhe bashkëpunimin me muzikantë shumë të mirë nga vende të ndryshme të botës kanë qenë disa nga shtytjet për tu formuar sa më mirë si muzikant.
Për të atdheu është vendi ku është lindur e rritur, ku familja dhe miqtë e fëmijërisë dhe shkollës jetojnë. Megjithëse ka disa vite që jeton larg Shqipërisë gjithmonë e ka në mendje, sado larg që jeton dhe është integruar në një shtet tjetër, rrënjët e tij janë dhe gjithmonë
do të mbeten në Shqipëri.
Në lidhje me aktivitetin e tij si aktivist dhe bashkëpunimin e shqiptarëve në Britani ai thekson se nuk ka qenë aktivist. Roli i tij është fokusuar në dhënien e mësimeve të pianos megjithatë disa nga studentëve të tij që janë shqiptar është munduar ti mësoj të luajnë në piano pjesë tradicionale shqiptare pasi mendon se të gjithë kemi një përgjegjësi sado të madhe ose të vogël që ti mësojmë brezave të rinj historinë tonë dhe traditat tona. Përveç koncerteve dhe bashkëpunimeve me orkestra te ndryshme, aktualisht Olsi është duke punuar për krijimin e një orkestre te re në Londër me muzikante profesionistë, ku do të interpretojnë repertorë të ndryshëm klasik, modern nga vepra premier të kompozitorëve të ndryshëm.
Një nga koncertet do të jetë me Muzikë të Kompozitorëve Shqiptar nga treva të ndryshme dhe do të jenë vepra premierë në Mbretërinë e Bashkuar. Olsi ka shumë dëshirë që veprat e kompozitorëve shqiptar të njihen nga publiku britanik dhe kush më mire se një dirigjent Shqiptar mund ti bëjë këto vepra të njohura.
Mesazhi i tij për shqiptarët në Britani është; “Jemi komunitet I një vendi të vogël dhe pak i njohur në Britani si dhe në shumë shtete të tjera të Evropës, kjo për shkak dhe të izolimit 45 vjeçar. Mendoj se është shumë e rëndësishme që secili prej nesh sado pak, të mundohet te promovoje dhe të përkrahë vlerat pozitive te popullit shqiptar në Art, Shkence, Sport, Histori, Tolerance fetare, Trashëgimi kulturore etj. Si Komb jemi shume gjëra që mund të krenohemi, le të mendojmë dhe punojmë për këto vlera”
