Kështu vlerësojnë njohës të sigurisë dhe zhvillimeve në vend, pas deklaratës që u bë dje nga ish lideri i Lëvizjes Vetëvendosje, Albin Kurti.
Ky i fundit, i cili njihet si më i zëshmi sa i përket shënjimit të kufirit me Malin e Zi, konsideron se Demarkacioni bën konfliktin, luftën dhe gjakderdhjet e reja me shtetin malazez.
Ndonëse Kurti pranoi se është kundër luftës me Malin e Zi, ai sqaroi se lufta ndodh ku është kontesti kufitar e territorial.
Njohësi i çështjeve të sigurisë, Naim Maloku në një prononcim për lajmi.net tha se Albin Kurti po luan me ndjenjat e të rinjve pasi ata sipas tij kanë prirje kryengritëse, por që shprehet i sigurt se popullit kosovarë nuk i konvenon lufta.
“Albin Kurti luan me ndjenja të një numri të vogël të rinisë në moshën e adoleshencës sepse faktikisht kanë prirje kryengritëse, në po këto ndjenja luan edhe ai. Mundohet që këto ndjenja t’i sensibilizojë, por nuk ka më luftë në Ballkan dhe as nuk do të ketë fatmirësisht, pasi popullit tonë shqiptar nuk i konvenon lufta dhe fatmirësisht as popujve tjerë”
.
Për më tepër, ai thotë se janë fuqitë e mëdha botërorë që nuk e lejojnë eskalimin e situatës deri në luftë, edhe nëse populli i Kosovës e do atë.
“NATO-ja është në Kosovë, Mali i Zi është në NATO, Shqipëria është në NATO, dhe janë disa si lloji i Albin Kurtit që dalin dhe bërtasin por në çdo shtet demokratik ndodhin këto segmente të tilla se ka luftë por nuk ka më luftë”.
I sigurt se në mes të Kosovës dhe Maliz të Zi s’do të ketë luftë, shprehet edhe analisti Belul Beqaj. Ai për lajmi.net shtoi se deklarata e Albin Kurtit është vetëm përcaktim i tij politik, por lufta nuk mund të ndodh.
“Deklaratat e tilla janë përcaktim i një politikani i cili e ka vlerësuar se rëndësia e Demarkacionit ka atë peshë e cila sipas tij mund të hap edhe një konflikt të ri. Sa është dhe a është kjo e qëndrueshme varet nga zhvillimi i proceseve të mëtejme. Mirëpo një çështje është e sigurt, sipas perceptimit tim luftë mes Kosovës dhe Malit të Zi nuk mund të ketë”
.
Ajo që me këtë rast mund të eskalojë sipas tij, janë vetëm konflikte ndërkufitare, dhe është pikërisht kjo që siç sqaron Beqaj, e ka menduar edhe Albin Kurti.
“Nëse vazhdon të thellohet politizimi i demarkacionit nuk mund të përjashtohet dhe me aq sa kuptova unë Albini nuk ka menduar në luftën në mes të Kosovës dhe Malit të Zi por ka menduar për konfliktin në kufij. Kjo nënkupton ndërhyrje të dy anëve, rrezikimit të kufitarëve, qytetarëve, dhe atyre që banojnë në brezin kufitarë, eventualisht rrezikime të ndryshme deri te mundësia e lëndimeve dhe vrasjeve. Por kjo nënkupton vetëm në brezin kufitar, të krijohet një gjendje e pasigurisë”
.
Çështja e Demarkacionit me Malin e Zi e ka ftuar vendin një krizë politike, e cila është duke zgjatur më shumë se një vit. Duke e ratifikuar këtë marrëveshje, pretendohet se Kosova humb mbi 8 mijë hektarë tokë.
