Ditën e djeshme, Komisariati iBulqizës bëri me dije se “është arrestuar në flagrancë shtetasi Faik Alla, 55 vjeç, banues në Bulqizë, pasi me datë 27.08.2016, në banesën e tij, për motive të dobëta ka ushtruar dhunë fizike dhe psikologjike ndaj nënës së tij, shtetases Hatixhe Alla, 101 vjeçe”.
Kanë qenë fqinjët e familjes Alla ata që kanë njoftuar Komisariatin e Policisë Bulqizë se Faik Alla po dhunonte nënën e tij të moshuar. Efektivët e Policisë kanë kryer arrestimin e 55 vjeçarit dhe kanë marrë në pyetje 101 vjeçaren. Sipas të dhënave nga Policia, pavarësisht moshës, e moshuara ka qenë në gjendje të mirë fizike, duke treguar se çfarë kishte ndodhur. Ajo ka pohuar se nuk ishte rasti i parë që djali e rrihte, i bënte presion dhe e fyente.
“Faiku më ka rrahur sa herë ka dashur. Më ka ardhur turp dhe nuk e kam denoncuar. Që kur humbi dy djemtë ai nuk është në terezi. Jam e bindur se ai është nxitur nga gruaja që të më dhunojë herë pas here”, është shprehur Hatixhe Alla, para oficerëve të Policisë Gjyqësore Bulqizë.
Ajo ka treguar dhe shenjat e dhunës në trup, ndërkohë edhe fqinjët janë shprehur se Faik Alla ishte i dhunshëm ndaj nënës së tij. 55 vjeçari nuk e ka pranuar akuzën dhe është shprehur se asgjë nuk është e vërtetë. Ai i tha Policisë se akuzat janë të padrejta, të bëra nga komshinjtë. “Unë nuk jam i çmendur të rrah nënën time. Ajo vërtet debaton vend e pa vend me gruan time, por unë në asnjë rast nuk e kam dhunuar. Janë fqinjët ata që kërkojnë burgosjen time, me pretendimin se unë alkoolizohem dhe u prish qetësinë”, tha Faik Alla për hetuesit e kësaj ngjarjeje të pazakontë.
FATKEQËSITË
Të afërm të familjes thanë se Faiku ka humbur dy djemtë e tij. Njëri është aksidentuar në minierat e kromit dhe kompanitë e sigurimeve e kanë shpërblyer me 60 milionë lekë dhe tjetri e ka humbur jetën teksa punonte në shfrytëzimin e lëndës drusore. Këto dy fatkeqësi duken se kanë qenë fatale për familjen Alla. “Prej kohës kur Faik Alla humbi dy djemtë ka nisur pijen dhe ai tashmë është në depresion. Ky mund të jetë shkaku i vërtetë që ai dhunon nënën e moshuar”, kanë sqaruar për Policinë komshinjtë e familjes Alla. Mësohet se pas arrestimit, 55vjeçari do t’i nënshtrohet ekzaminimeve mjekësore para se Gjykata e Rrethit Gjyqësor Dibër të marrë masën e sigurisë për të./Panorama
