Kryeministri Edi Rama mori pjesë sot në Akademinë Politike të Partisë Socialiste, e cila kishte qëndruar në hije prej disa vitesh, kur PS ishte në opozitë dhe tashmë është ristrukturuar nga ministri Saimir Tahiri.
Kështu bëri të ditur kreu i Qeverisë, i cili foli para të rinjve socialistë për arritjet e kabinetit që drejton, duke mos lënë jashtë vemendjes reformën në drejtësi dhe akuzat e Partisë Demokratike. Duke folur për këtë fundit, Rama preku edhe debatin që bëhet për ndërtimin e kullës në stadiumin ‘Qemal Stafa’ dhe akuzat e opozitës për investimet e Qeverisë, që janë të panevojshme në një kohë kur vendin është në krizë ekonomike dhe populli nuk ka para të mjaftueshme për ushqim.
Por, Kryeministri Rama ktheu këtë përgjigje: “Ata që udhëheqin reformat sulmohen më shumë. Ka shumë njerëz që reagojnë keq kur shohin të celet një muze i ri apo të ndërtohet një stadium i ri. Ne s’kemi bukë ju bëni stadiume, muzeume, qendra qytetesh. Ky është një reagim i kuptueshëm kur vjen nga njerëz të varfër dhe të dëshpëruar, por pervers kur vjen nga njerëz të pasur, nga opozita. Të thuash njeherë buka pastaj shpirti, pastaj mëndja, është një perversitet i madh politik sepse këto janë të gjitha gjëra që shkojnë bashkë. Njerëzit jetojnë së bashku. Mjafton të shohim se çfarë i sjellin qyteteve ndryshimet që po bëjmë ne, se cfarë mundësi për të pasur më shumë akses në kulturë. Prandaj me kurajo dhe pasion ta cojmë përpara këtë betejë me të gjitha kostot”.
Sa i përket reformës në drejtës, Rama u shpreh se kjo nuk është një betejë vetëm e mazhorancës, por edhe e të rinjve për të patur një të ardhme më të mirë. Kryeministri sulmoi sërish indirekt opozitën se është kundër kësaj reforme, kurse Qeveria sipas tij po përballet me një agresivitet të madh.
“Çfarë e pengon reformën në drejtësi dhe kush mund të dalë kundër kësaj nevoje që është një nevojë historike e popullit shqiptar. Askush nuk mund të thotë se është kundër kësaj, por ama është qartësisht evidente që kundërshtia ndaj reformës është shumë e fortë sepse reforma në drejtësi është reformë për Shqipërinë e gjeneratës tjetër, dhe Shqipëria e gjeneratës tjetër nuk mund të ndërtohet pa kosto dhe pandëshkueshmëri për cka ka ndodhur.
Na duhet të përballemi përditë me agresivitetin e fomave konservatore, me agresivitetin e një të djathte që me të djathtën europiane nuk ka aspak të bëjë. Kjo është një përballje që kemi nevojë për energji të mëdha”, u shpreh Kryeministri Edi Rama./SYRI.net/
