Shqiptarët zgjedhin të largohen me tragete. Për dy muaj kanë ikur drejt Italisë rreth 62 mijë qytetarë, ndërsa kanë hyrë më pak se gjysma e kësaj shifre, sipas të dhënave të Autoritetit Portual të Durrësit. Gjatë periudhës janar-shkurt të këtij viti, tragetet e linjave kanë transportuar më shumë udhëtarë dhe mallra sesa në të njëjtën periudhë të vitit 2015. Sipas të dhënave zyrtare nga Autoriteti Portual i Durrësit, tragetet janë shfrytëzuar nga rreth 95 000 udhëtarë shqiptarë dhe të huaj, një shifër 14% më e lartë sesa dymujori i parë i vitit të kaluar. Tragetet kanë kryer 18 lundrime më shumë sesa e njëjta periudhë e vitit 2015 dhe shifrat e transportit në dy muajt e parë të këtij viti janë më të larta sesa ato të periudhës janar–shkurt 2015. Sipas të njëjtit burim, 61 667 udhëtarë janë nisur me tragete drejt porteve të Barit, Brindisit, Triestes dhe Ankonës (Itali), duke shënuar një rritje prej 12 për qind krahasuar me janar-shkurtin e vitit paraardhës. Numri i udhëtarëve në hyrje ka qenë shumë më i vogël se në dalje, vetëm 33 1299 vetë, duke regjistruar gjithsesi një rritje prej 19%. Statistikat bëjnë me dije se shifrat e udhëtarëve vendas që shfrytëzojnë tragetet kanë shënuar një rritje prej 13% dhe po aq rritje ka në shifrat e udhëtarëve të huaj që zgjedhin këtë lloj shërbimi. Gjatë këtij dymujori, tragetet kanë transportuar 18,856 autovetura, me 27% mjete më shumë, dhe mbi 10 400 kamionë e trajlerë. Sasia e mallrave ka arritur në 118 531 ton ose 4% më shumë sesa në dy muajt e parë të vitit 2015.
