Në Kosovë janë regjistruar katër raste të reja të infektuar me virusin HIV/AIDS, njoftojnë zyrtarë të Institutit Kombëtar të Shëndetit Publik.
Luljeta Gashi nga ky institut, tha për Radio Kosovën se, nga viti 1986, kur është paraqitur rasti i parë, e deri me sot, gjithsejtë janë shënuar 94 raste të infektuar, 40 nga ta kanë përfunduar me vdekje, ndërsa 14 të infektuar po trajtohen me terapi antiretrovirale dhe janë nën mbikëqyrjen e mjekeve të Klinikës Infektive në QKUK.
Sëmundja e shekullit e cila çdo vit merr jetë njerëzish në mbarë vendet e botës, nuk po e kursen as vendin tonë. Luljeta Gashi nga Instituti Kombëtar i Shëndetit Publik të Kosovës, tha se, edhe pse Kosova njihet si vend me rrezikshmëri të ulët të infeksionit, çdo vit po shënon raste të reja të infektuar me Hiv/Aids. “Gjatë vitit 2014 ne i kemi të raportuara katër raste, një është me Aids ndërsa tre me Hiv. Që nga viti 1986 kur është raportuar rasti i parë, e deri më tani, gjithsejtë i kemi 94 raste, prej tyre 49 janë me Aids dhe 45 me Hiv, prej tyre 40 raste i kemi të raportuara si të vdekur”, tha Gashi.
Disa nga pacientët e infektuar me Hiv po trajtohen me terapi antiretrovirale dhe gjendja shëndetësore është stabile, informon infektologu Murat Mehmeti. “Në klinikën tonë, për momentin, janë 14 pacientë, të cilët marrin terapinë antiretrovirale, derisa edhe gjashtë të tjerë janë ende pa terapi. Do të thotë – këta gjashtë të tjerë ende nuk i kanë plotësuar kushtet për terapi, mirëpo janë nën përcjelljen tonë”, thotë Mehmeti.
Epidemiologia Gashi shpjegon se cilat mosha janë më të rrezikuara nga ky infeksion. “68 për qind e të gjitha rasteve i takojnë gjinisë mashkullore dhe 32 për qind janë femra, ndërsa mosha më e atakuar është 25 deri 34, në 36 për qind. Ndërsa, mosha 35 deri 44 janë 31 për qind. Kemi raste edhe prej moshës 0 deri në 14 vjeç janë 3 për qind të numrit të gjithmbarshëm”, shton Gashi.
Pacientët e infektuar me Hiv/Aids, të cilët janë në mbikëqyrje të mjekëve në Kliniken Infektive në QKUK, fatmirësisht janë në gjendje të mirë shëndetësore, por mungesa e barnave mund të shkaktoj telashe të shumta në shëndetin e tyre, shpjegon Dr. Murati. “Asnjëherë nuk kemi qenë të furnizuar rregullisht me terapi. Gjithmonë kemi mungesa dhe faktikisht pacientët shpeshherë kanë mbetur edhe pa terapi. E, në të njëjtën situatë jemi edhe momentalisht, duke qenë se kemi disa lloje të barnave të cilat i marrin disa pacientë, pra kemi mungesë të disa llojeve, që do të thotë është një numër i pacientëve që për momentin është pa terapi”, tha një pacient që po kurohet në Klinikën Infektive.
Ndërsa, drejtori i Departamentit për Informim në Ministrin e Shëndetësisë, Faik Hoti, ka bërë të ditur se Klinika Infektive në QKUK i ka barnat e nevojshme për trajtimin e rasteve të kësaj sëmundjeje. Sipas tij, vetëm sa i përket një bari sasitë janë duke u shpenzuar, mirëpo Ministria e Shëndetësisë e ka siguruar edhe atë lloj dhe dërgesat e terapisë që do të bëhen në klinikë dhe do të mundësohet furnizimi i vazhdueshëm me terapi kundër HIV/AIDS-it, përfshirë këtu edhe terapinë antiretrovirale.
Por, njëri nga të infektuarit e mohon një gjë të tillë. “Terapia antiretrovirale ka filluar që nga viti 2005 dhe prej atëherë kemi pasur komplikime. Momentalisht janë dy persona në rrezik dhe janë një grup i personave që marrin një terapi dhe ka mbetur pa barna, sepse nuk ka vazhdimisht. Por, po shpresojmë që brenda muajit, përmes UNICEF-it të furnizohemi me këto terapi”, tha pacienti.
Shqetësim tjetër që vlen për t’u theksuar është se viteve të fundit kanë filluar të rezultojnë me Hiv pozitiv edhe grupet me rrezikshmëri të lartë siç janë: MSM-at, apo meshkujt qe bëjnë seks me meshkuj, tha Gashi. “Kohën e fundit kemi një rritje të rasteve të cilat zbulohen me Hiv-infeksion në mesin e komunitetit MSM, pra meshkujt që bëjnë seks më meshkuj. Dhe, duhet, po ashtu, të cekim që është në përfundim e sipër duke u zhvilluar hulumtimi i mbikëqyrjes biologjike, i sjelljeve për Hiv në mesin e grupeve me rrezikshmëri të lartë: përdoruesve të drogave injektuese, meshkujve që kanë seks me meshkuj dhe punëtorëve të seksit komercial”, tha më tej Luljeta Gashi.
Mjekët këshillojnë të rinjtë që sa më shumë të jenë të kujdesshëm, të mbrohen nga sëmundjet seksualisht të transmetueshme, duke përdorur kontraceptivë. Po ashtu, ata të cilët mendojnë se kanë qenë të ekspozuar ndaj rrezikut, preferohen të drejtohen në qendrat për testim dhe këshillim, të cilat ndihmojnë se si duhet të mbrohet shëndeti i qytetarëve të vendit.
