Derisa ora sot të shënojë 11.00, kur të gjyqtarja Blerina Muça të zhvillojë seancën gjyqësore, guvernatori Ardian Fullani do të duhet të rrijë pa kollaren e tij, në ambientet e paraburgimit të Policisë së Tiranës. Kjo për shkaqe sigurie. Me insistim, Fullani u pat kërkuar oficerëve të policisë që kostumit të tij bezhë e hapur, të mos ia hiqte kollaren, pasi si zyrtar i lartë nuk ishte mësuar të rrinte pa të në ambiente publike. E megjithatë, procedura strike ia ndaloi. Një pako me ilaçe tensioni, disa palë ndërresa e rroba, mjete të higjenës personale si dhe ushqim i konservuar dhe disa ëmbëlsira janë të vetmet gjëra që e shoqëruan numrin një të financave shqiptare, atje në qelinë speciale të paraburgimit, ku ndodhet vetëm. Një natë e trazuar duket se ishte e shtuna për Fullanin, i cili prej orës 22.00 e deri në orën 3 të mëngjesit, është trajtuar me qetësues. Pas asaj ore, nuk ka pasur më komunikim me dhomën e paraburgimit, çka nënkupton që edhe gjumi e ka zënë rreth asaj kohe. Me një gjuhë prej zyrtari, guvernatori u tha me mirësjellje oficerëve të policisë vetëm frazën “Zbatoni ligjin”. Me porosi të veçantë nga prokurori i çështjes Ramadan Troci dhe kryepolici Artan Didi, është vendosur që Fullanit, por edhe Inspektores së Përgjithshme Elivar Golemi t’i krijohen të gjitha kushtet e nevojshme, për shkak të personalitetit të tyre. Detajet janë bërë të ditura për gazetën “Shekulli” nga burime të mirëinformuara pranë Policisë së Tiranës, të cilat konfirmuan edhe faktin që Erik Fullani qëndroi dje vetëm për rreth 15 minuta pranë të atit, të cilit i ka dhënë rrobat, ushqimin dhe ilaçet dhe pas një bisede të shkurtër, është larguar. Ndërkaq, gruaja e tij, Arjana Fullani, nuk është takuar me Fullanin, siç duket pas një kompromisi për të qenë Eriku përfaqësuesi i familjes. Me një prokurë të posaçme familja ka pajisur edhe avokatin Maks Haxhia, i cili nga ky moment e tutje përfaqëson mbrojtjen ligjore të Fullanit. Sipas të njëjtave burime mësohet se askush tjetër përveç familjes dhe avokatit nuk ka shfaqur interes për tu takuar me guvernatorin edhe për shkaqe strike procedurale. Mirëpo këto procedura nuk i ndaluan të interesuarit që të kundronin nga jashtë ambienteve të policisë se ç’bëhej atje brenda. Fakti që Fullani vuante nga tensioni u vu re që pardje, kur rreth orës 21.30, mbërriti në ambulancë pranë Policisë së Tiranës, por prania e medias, bëri që ajo të largohej shpejt. Ndërkaq, burimet policore thanë se përveç ilaçeve të tensionit, Fullani është trajtuar edhe me qetësues. Burimet shtojnë se fillimisht, gjatë momenteve të para të shoqërimit, aty pak para orës 20.00, të së shtunës, pasi u soll nga sheshi “Avni Rustemi”, guvernatori ishte fare i qetë në përballjen me oficerët, të cilëve u dha gjeneralitetet dhe u kërkoi që të zbatonin ligjin, pa shfaqur kurrfarë rezistence të asnjë lloji. Mirëpo, ndoshta fakti se Fullani nuk ishte mësuar me procedurat policoro-hetimore, e ka bërë që të mos e kuptonte dot faktin se përse nuk i duhej lejuar kollarja në qeli, ndërsa pas sqarimit se mjetet prerëse, rripat, lidhëset e këpucëve, kollaret, etj, janë elementë që përbëjnë rrezikshmëri për reagime në momente dëshpërimi, është bindur. Kështu, bashkë me Elivar Golemin, janë akomoduar në dhoma të ndara të paraburgimit, të cilat ruhen nga policët dhe janë të vëzhguara me kamera, aty ku vijojnë të qëndrojnë ende dhe me shumë mundësi do të jenë deri në një tjetër zhvillim të procesit gjyqësor. Sot, në orën 11.00, përpara gjyqtares Blerina Gjoka, në prani në avokatëve Maks Haxhia e Fatos Shanaj si dhe të prokurorit Ramadan Troci, ata vetëm sa do të njihen me masën e sigurisë “arrest me burg”, e cila ka nisur të zbatohet. Kësisoj, e vetmja lëvizje e palës mbrojtëse, mbetet ajo e apelimit të çështjes. Fullani akuzohet për veprën penale “Shpërdorim detyre”, që sipas Kodit Penal, parashikon dënim deri në shtatë vjet burg si dhe një gjobë nga 300 mijë deri në 1 milionë lekë.
Avokati i Golemit: Do ta ankimojmë në Apel, pasi u ezaurua Shkalla e Parë
Në një reagim për mediat, Fatos Shanaj, avokati i inspektores së Bankës së Shqipërisë Elivar Golemi, e cilësoi si të paligjshme të gjithë procedurën e arrestimit të klientes së tij. Pas një takimi me Golemin avokati Fatos Shanaj theksoi se ditën e hënë do të kërkojë ndryshim të masës së sigurisë. Ndër të tjera Shanaj tha se “Mora kontakt me të, është dhënë një masë sigurimi “arrest me burg” që për mua procedura është e pa ligjshme. Kjo na heq mundësinë për tu mbrojtur në shkallën e parë. Në këtë moment nuk diskutohet fajësia. Nuk besoj se mos shkuarja në komision ka lidhje me akuzën, ç’lidhje ka vepra penale me mos paraqitjen në komision.” Më tej ai theksoi se vendimi do dërgohet në Gjykatën e Apelit pasi shkalla e parë u ezaurua. “Do kërkojmë të ankojmë vendimin në Apel sepse shkalla e parë u ezaurua. Do kërkojmë masë tjetër. Hetim do ketë ne s’mund ta pengojmë. Kush është rrezikshmëria që morën arrest me burg për një vajzë 37 vjeçe intelektuale?”- u shpreh Shanaj. Inspektorja e Përgjithshme e BSH-së, Elivar Golemi, u arrestua pasditen e së shtunës, pas një urdhërarresti, të firmuar nga Gjykata e Tiranës, teksa kishte refuzuar dy herë të paraqitej në Komisionin e Ekonomisë.
Jeta, karriera, pasuria dhe “peripecitë” e Fullanit
Ardian Fullani u zgjodh Guvernator i Bankës së Shqipërisë në tetor të vitit 2004, kur zëvendësoi në këtë detyrë Shkëlqim Canin për t’u rizgjedhur në nëntor 2011,. Ai është guvernatori i gjashtë i sistemit pluralist. Ardian Fullani është diplomuar në Fakultetin Ekonomik, Dega Financë dhe në Fakultetin Juridik, pranë Universitetit të Tiranës, përkatësisht në vitin 1977 dhe në vitin 1991. Fullani ka qenë pjesë e administratës së Bankës së Shqipërisë që prej vitit 1985 (atëherë Banka e Shtetit Shqiptar). Më pas në periudhën 1987-1990 kishte detyrën e zv/drejtorit të Departamentit të Jashtëm. Fillimi i punës së Fullani në fushën e bankingut qendror i takon vitit 1992, në funksionin e Zëvendësguvernatorit të Bankës së Shqipërisë e në vijim në periudhën 1993-1996, si Drejtor i Departamentit të Jashtëm. Fullani ka mbajtur edhe funksionet e Presidentit të Shoqatës Shqiptare të Bankave, të Institutit të Studimeve e Asistencës Bankare si dhe të Komisionerit në Komisionin e Letrave me Vlerë. Ai mban titullin “Commendatore dell’Ordine della Stella della solidarietà italiana/ Urdhri i Yllit të solidaritetit italian”, i akorduar nga Presidenti i Republikës së Italisë.
Ndërkaq, pasuria e guvernatorit Ardian Fullani dhe e familjarëve, sipas deklarimeve të tij në ILDKP, rezulton të jetë disa milionëshe. Vetëm koleksionet e orëve të djalit të tij, Erikut shkonin në mijëra euro, teksa zyrtarisht Fullani, nga viti 2004 e deri në 2008-n deklaronte disa prona dhe llogarinë bankare në 165 mijë USD. Në 2009-n çifti Fullani ka blerë një tokë në Farkë të Madhe në Tiranë 3800 metra katrorë, me vlerë 220 mijë euro. Kanë prenotuar apartament banimi në malin e Robit duke shlyer 50 mijë euro. Kanë tërhequr 178 mijë USD nga një bankë, teksa në vitin 2011 bënë një kontratë sipërmarrjeje për apartament dhe garazh në rrugën “Ismail Qemali” në Tiranë. Rezulton se janë bërë edhe ortakë në një firmë private. Sakaq, ndodhen në verifikim e sipër pasuritë e të gjithë zyrtarëve të lartë të Bankës së Shqipërisë, për të cilët tashmë ka nisur edhe hetimi administrativ. Ndërkaq, më 5 gusht, Këshilli Mbikqyrës e mbrojti Fullanin, të cilit i dha 6 vota për ta ndaluar shkarkimin që e kishte propozuar Ermelinda Meksi, anëtarja që e vetme votoi pro shkarkimit të tij. Në daljet e ralla publike, pak para mediatizimit të skajshëm që skandalit të vjedhjes, që vetë banka e zbuloi, Fullani deklaronte se thesari nuk ishte prekur, ndërsa një valë reagimesh mbërritën, kryesisht nga shoqëria civile, e cila sot numëron 14 mijë vota për shkarkimin e tij. Politika rrekej të heshtte, përveç dy a tri elementëve si Erion Braçe, që thuajse përditë kërkonte shkarkimin e tij dhe gjetjen e përgjegjësve për vjedhjen e 713 milionë lekëve apo të Spartak Brahos, i cili në cilësinë e Kryetarit të Komisionit të Sigurisë, kërkonte fajësi te Këshilli Mbikqyrës. Nga ana tjetër, Fullani në të vetmen intervistë për një të përditshme rrekej të shfajësohej, duke thënë se vetë Banka e denoncoi vjedhjen e 713 milionë lekëve dhe se përpos faktit që nuk e shikonte të arsyeshme largimin e tij nga ky post, kërkonte që të mos abuzohej me akuzat ndaj tij. Fotot e djalit, Eriut, i cili fshinte ballin me kartëmonedha 500 euroshe, irrituan mbarë opinionin publik, i cili pasi pa jetën luksoze të familjes Fullani e rriti reagimin ndaj këtij skandali, ndonëse nuk u përfshi në protesta masive.
Fullani, i dyti guvernator i arrestuar në 22 vitet e fundit
Fullani është guvernatori i dytë i Bankës së Shqipërisë që arrestohet, pas viteve ’90. Në prangat e policisë, në vitin 1992 ra edhe ish-guvernatori Ilir Hoti. Ai, së bashku me disa drejtues të tjerë të Bankës së Shqipërisë, u akuzuan për skandalin “Arsidi” dhe bëri disa vite burg. Nikolas Arsidi, që u paraqit si biznesmen francez, firmosi një marrëveshje me qeverinë teknike për të negociuar për borxhin e jashtëm. Arsidi do të përfitonte 1.6 milionë dollarë për këtë punë, teksa kjo u përcaktua dhe në marrëveshjen e nënshkruar nga qeveria shqiptare. Këto para dolën nga Thesari i Shtetit për të paguar biznesmenin francez, të cilat më pas u zhdukën dhe nuk dihet se shkuan. Ndërkaq, në vitin 1993 policia arrestoi funksionarët e lartë të shtetit, ish-kryeministrin Vilson Ahmeti, guvernatorin e Bankës së Shqipërisë Ilir Hotin, drejtorin e Bankës së Kursimeve Agim Tartarin, dhe Agron Saliun. Ndërsa në vitin 2002 u arrestua dhe zëvendësguvernatori i Bankës së Shqipërisë Dhame Pite.
Lista me 19 të Arrestuarit
1-Ardian Fullani, Guvernator i Bankës
2-Elivar Golemi, Kryeinspektorja e Bankës së Shqipërisë
3-Ardian Bitraj, përgjegjës i zyrës së stokut të Thesarit
4-Mimoza Bruzia, punonjëse në Departamentin e Emisionit
5-Petrit Ramohitaj, përgjegjës i arkës në veprim, në Departamentin e Emisionit
6-Liljana Tusha, specialiste e arkës në veprim, në Deprtamentin e Emisionit
7-Lavdim Cani, specialist i arkës stok (tranzit) pranë Deprtamentit të Emisionit
8-Myzejen Belba, specialiste e arkës stok
9-Dhimitër Davidi, vëzhgues-operator, pranë departamentit të sigurimit
10-Klevis Bejtja, nipi i Ardian Bitrajt, nuk është punonjës i Bankës
11-Bashkim Xhilaga, Shef i arkës stok dhe në veprim
12-Dorian Çollaku, ish-Drejtori i Thesarit
13-Gentian Jahja, punonjës
14-Ilir Dedja, punonjës
15-Emiljano Lamçe, punonjës
16-Mehdi Marku, punonjës
17-Bahri Allushi, punonjës
18-Mehdi Molla, punonjës
19-Fatbardha Gurthi, punonjës
Ramadan Troci, prokurori që hetoi Ardian Fullanin
Prokurori i çështjes është Ramadan Troci, 36 vjeç, nga Dibra, i martuar dhe baba i dy fëmijëve. Ai punon në njësinë Task Forcë të Antikorrupsionit në Prokurorinë e Tiranës. Më herët Troci ka punuar si prokuror i sektorit të vrasjeve në linjën nr. 1 të Prokurorisë së Tiranës. Në këtë Prokurori, Troci punon që prej prillit të vitit 2012, ndërsa më herët ka qenë prokuror në Bulqizë. Pak kohë më parë ai firmosi urdhër arrestin për ish-drejtorin e INUK-ut, Zyhdi Dajti. Ai ka në dorë çështje të rëndësishme si refuzimi i urdhër arresteve për 21 janarin ku janë të akuzuar ish-drejtori i policisë së Tiranës Hysni Burgaj dhe ish-zëvendësi i tij, Agron Kuliçaj. Disa hipoteza për mbrojtjen emergjente të tij, janë hedhur së fundmi, për shkak të rëndësisë së kësaj çështjeje, ndërsa mbetet në dorën e tij kjo lloj kërkese.
