Ministri i Drejtësisë, Nasip Naço, po zhvillon një vizitë zyrtare në Kosovë, pjesën ë axhendës së të cilës janë disa takime të nivelit të lartë. Në nisje të takimeve zyrtare, Naço është pritur nga homologu i tij, Hajredin Kuçi. Forcimi i marrëdhënieve dypalëshe ka qenë temë qendrore e diskutimit, mbi të cilën është mbështetur biseda e dy ministrave. Ministri Nasip Naço ka theksuar se ndasitë e diktuara për shkak të rrethanave historike, duhet rikuperuar përmes vendosjes së marrëdhënieve bilaterale në të gjitha fushat, përfshirë edhe drejtësinë. Nga ana e tij, Ministri Kuçi ka shfaqur interes lidhur me funksionimin e mbikëqyrjes elektronike, për të cilën do të ishte me rëndësi dhënia e disa specifikimeve teknike. Në nivelin e deritanishëm të bashkëpunimit të dy ministrat kanë mbetur të kënaqur, ndërsa dakorduan mbi nisjen e një marrëveshjeje në fushën e të drejtës civile.
Gjatë konferencës pasuese për shtyp të dy ministrat theksuan nevojën e ndërmarrjes së reformave të shkëmbimit të eksperiencës, duke pasur objektiv ngritjen e një sistemi drejtësie lider në rajon, për sa i takon thellimit të reformave. Me tej, Naço evidentoi rëndësinë e sigurisë juridike në të dyja vendet, si një fakt përcaktues edhe në nivel të përthithjes së investimeve të huaja. “Reformat tona do të jenë në një linjë me standardet e BE, duke qenë se anëtarësimi në të është një sfidë e përbashkët”, tha Naço. Në vijim të takimeve zyrtare, Naço është pritur edhe nga Kryetari i Kuvendit të Kosovës, Kadri Veseli. Gjatë takimit u vlerësua rëndësia e një dialogu politik parlamentar, i cili do të ishte në shërbim të thellimit të reformave. Ministri Naço theksoi se vullneti politik dhe gjithëpërfshirja janë çelësi i suksesit të reformave. Referuar ngjarjeve të fundit të shënuara në Kosovë, Ministri Naço vlerësoi se duhen respektuar të drejtat e pakicave apo edhe opozitës për të protestuar, por kjo duhet të ndodh brenda standardeve të gjithëpranuara demokratike, duke mos cenuar proceset integruese të vendit. Më tej, Ministri Naço është takuar edhe me kryesuesin e Këshillit Gjyqësor të Republikës së Kosovës, Enver Peci.
