Muzeu “Musine Kokalari” me mbështetjen e Bashkisë Gjirokastër dhe Fondacionit Friedrich Ebert organizojnë aktivitetin “Musine, Muza ime”, aktivitet njohës për Musine Kokalarin dhe gjurmëlënien e saj në shoqërinë shqiptare si shkrimtarja e parë shqiptare, studiuese, opozitare e bindur dhe e palëkundur e regjimit komunist, përhapëse dhe mbrojtëse e ideve pluraliste në Shqipërinë e pas Luftës së Dytë Botërore, mbrojtëse e mendimit të lirë. Nesër do të zhvillohet një aktivitet ku do të referojnë studiues të shumtë nga Kosova, Shqipëria, Gjermania, Belgjika me synimin të njihet aktiviteti i shumanshëm i Musine Kokalarit në jetën shoqërore, intelektuale dhe politike. Të njihet jeta, vepra dhe qëndrimi i saj përballë makinës së diktaturës, si frymëzim për mendimin demokratik dhe marrëdhëniet demokratike në shoqëri.
Të nxiten aktorë dhe faktorë te interesuar për studimin në thellësi të veprës së Musine Kokalarit. Të krijohen marrëdhënie midis studiuesve në këndvështrime të ndryshme të Musine Kokalarit, për bashkëpunim dhe bashkërendim të punës së tyre në aktivitete të përbashkëta në të ardhmen. Të nxisë organizimin e aktiviteteve për kujtimin e 100-vjetorit të lindjes së Musine Kokalarit dhe sensibilizimin për mbështetjen e tyre. Të nxisë organizimin e aktiviteteve të ngjashme të kujtesës për personalitete historike dhe shoqërorë të pandriçuar plotësisht nga shoqëria e sotme. Musine Kokalari lindi më 10 Shkurt të vitit 1917, në Adale, të Turqisë. Në vitin 1921, familja e saj kthehet në Shqipëri dhe vendoset në Gjirokastër, ku Musineja kreu shkollën fillore. Nëntë vjet më vonë, familja Kokalari vendoset në Tiranë. Në vitin 1937, Musineja mbaroi shkollën e mesme “Nëna Mbretëreshë” dhe më pas shkoi për studime në Universitetin e Romës, në Itali, të cilin e mbaroi shkëlqyeshëm në vitin 1941.
Ajo botoi librin e saj të parë “Seç më thotë nana plakë” në vitin 1939. Ishte viti 1943, kur Musine Kokalari së bashku dhe me disa shokë të tjerë formuan Partinë Socialdemokrate. Një vit më vonë, me përpjekjen e saj, doli numri i parë i gazetës “Zëri i Lirisë”. Në vitin 1944, botoi librin e saj të dytë “Rreth Vatrës”, ndërsa më 12 nëntor të po këtij viti u pushkatuan vëllezërit e saj, Muntaz e Vesim Kokalari. Katër ditë më vonë e arrestuan dhe Musinenë, të cilën e mbajtën 17 ditë në burg. Në janar të vitit 1945, u botua libri i tretë i Musine Kokalarit “Sa u tund jeta”. Më 23 janar të vitit 1946, ajo u arrestua për së dyti nga forcat e Mbrojtjes së Popullit e gjyqi e dënoi me 20 vjet heqje lirie. Në vitin 1961, e nxjerrin nga burgu dhe e internuan në Rrëshen, ku dhe doli në pension me gjysmë page. Në vitin 1981, sëmuret nga sëmundja e kancerit, që dy vjet më pas do ta largonte përgjithmonë nga jeta.
