Këshilli Shkencor i Institutit të Antropologjisë Kulturore dhe Studimit të Artit i Qendrës së Studimeve Albanologjike u mblodh dhe diskutoi për përgjegjësitë e veta lidhur me Festivalin Folklorik Kombëtar të Gjirokastrës, 2015. Drejtoresha e Përgjithshme e Planifikimit Strategjik për Trashëgiminë dhe Diversitetin Kulturor, znj. Zhulieta Sina Harasani, pohon se puna e parë ishte përcaktimi i kritereve shkencore për Festivalin Folklorik, Gjirokastër, 2015. “Kriteret shkencore të qarta, të koncentruara dhe të kuptueshme janë të nevojshme për të siguruar sjelljen e vlerave autentike etnofolklorike në këtë veprimtari me përmasa të mëdha dhe rëndësi të veçantë, sa i përket ruajtjes dhe afirmimit të trashëgimisë sonë kulturore. Zbatimi i tyre nga të gjitha instancat përgjegjëse, sipas detyrave, do të mundësojë realizimin sa më mirë të qëllimit të organizimit të Festivalit Folklorik Kombëtar, Gjirokastër, 4 – 9 prill të 2015”, pohon Harasani. Do të marrin pjesë që të 12 qarqet e Shqipërisë, nëpërmjet 12 grupeve përfaqësuese, gjithashtu edhe Ministria e Kulturës së Kosovës është jo vetëm bashkëpunëtore në aktivitet, por edhe ajo ka përfaqësinë e saj, ashtu sikurse edhe Maqedonia, Mali i Zi, diaspora, folklori çam, do të zgjerojnë hapësirat gjeografike të folkut shqiptar. Me shpalljen e kritereve shkencore, drejtoresha Zhulieta Sina Harasani bën të ditur se ditën e martë në ministri do të ketë një takim me përfaqësues të 12 qarqeve mbi zbatimin e kritereve që duhet të jenë në vëmendje për materialet e festivalit. “Të martën do të jetë një takim me përfaqësues të 12 qarqeve mbi kriteret shkencore të festivalit, se si do të punohet për të ndjekur grupet folklorike. Shqetësim mbeten kostumet popullore, por po punohet në këtë drejtim”, pohon Harasani drejtoresha e trashëgimisë në Ministrinë e Kulturës. Kriteret shkencore të festivalit Festivali Folklorik Kombëtar konsiderohet skena më e madhe dhe duhet të paraqiten krijimet folklorike dhe veshjet e të gjitha krahinave. Nuk pranohen krijime në të cilat janë bërë ndërhyrje dhe përpunime jashtë natyrës së melosit popullor tradicional. I njëjti qëndrim mospranues do të mbahet edhe për tekstet e këngëve. Të mënjanohen sa më shumë elementet spektakolare, teatralë e skenikë që i denatyrojnë vlerat autentike. Të shmangen krijimet e koreografëve, të cilat krijojnë konfuzion në përcaktimin e motiveve të valleve. Të shmangen elementet e marrë nga grupet artistike të gatshme që aktivizohen nëpër qytete dhe pretendojnë pa parakushtet e duhura se janë përfaqësues të folklorit. Të tregohet vëmendje për paraqitjen e disa gjinive folklorike si për këngët e kreshnikëve, baladat, këngët e epikës historike etj. Nxiten të sillen edhe këngët, vargjet, lodrat e ndryshme popullore që luajnë të rinjtë apo fëmijët me shtregulla apo rreth zjarreve rituale, imitimet e zogjve dhe kafshëve, ndjellja e bagëtive, e bletëve etj. Të bëhet kujdes duke shmangur plotësisht përdorimin e sandaleve moderne (për gratë) apo këpucëve atlete (për burrat).
