Ministri i Jashtëm grek Nikos Dendias ka deklaruar se tashmë është zgjidhur çështja e kufirit detar me Shqipërinë, dhe se Greqia shtrihet 12 milje në detin Jon.
Në një intervistë të gjatë për Newsbomb.gr, ai preku të gjitha frontet e nxehta në nivel kombëtar dhe gjeopolitik, duke përfshirë këtu raportet e tensionuara me Turqinë dhe çështjen e detit me Shqipërinë.
Dendias tha se është vendosur tashmë shtrirja me 12 milje në Jon dhe s’ka mbetur më asgjë për t’u diskutuar, përveç disa detajeve teknike që do ti çojnë palët në Hagë. Dendias shtoi se çështja është zgjidhur me vendim të njëanshëm, por ama ka marrë dhe miratimin e palës shqiptare.
Pjesë nga intervista e Dendias:
Tani duke qëndruar tek çështja greko-turke dhe te tema e dialogut në nivelin më të lartë mes dy palëve që ishte ndërprerë. Çfarë po ndodh me dialogun Dendias – Çavu?o?lu? A është homologu juaj i përgjegjshëm? Dhe nëse po, sa e rëndësishme mendoni se është kjo? Në kuptimin, nëse mund të ndikojë në gjendjen shpirtërore të përgjithshme. Vështirë, mendoj unë.
E njoh shumë mirë zotin Çavu?o?lu. Prandaj, nëse më pyesni nëse ka një kanal komunikimi mes nesh, në nivel personal ka gjithmonë një kanal komunikimi. Megjithatë, nëse ky mund të jetë një kanal për bisedime ndërshtetërore, mendoj se presidenti Erdogan në mënyrën më absolute e ka ndërprerë këtë. Ka ndërprerë të gjitha kontaktet.
E kisha fjalën për klimën. Nuk thashë nëse do të ndodhin mrekulli. Nëse kjo mund të ndikojë te klima e përgjithshme.
Megjithatë, në situatën aktuale ajo që po përpiqemi të bëjmë është të parandalojmë përshkallëzimin e mëtejshëm. Jemi shumë larg një mirëkuptimi të përzemërt apo një klime diskutimi.
Më lejoni të bëj një parantezë këtu. Ju iu referuat çështjes së zgjerimit, të drejtës sonë ligjore për të shtrirë ujërat tona territoriale në 12 milje. Ka informacione, të cilat ju kërkoj ti mohoni ose konfirmoni, se jemi mjaft afër Shqipërisë për të shtrirë ujërat tona territoriale në 12 milje.
Kjo tashmë është bërë. Shqipëria ka 12 milje dhe ne kemi 12 milje. Në Jon kemi 12 milje.
Me Shqipërinë është bërë?
Është bërë. Nuk është bërë “me”, është bërë në mënyrë të njëanshme. Sepse është e drejta jonë. Por kjo është bërë me mirëkuptim të plotë nga të dyja palët.
Po, e kam fjalën për institucionalizimin e kësaj gjëje. A jemi afër?
Ajo që duhet bërë me Shqipërinë është të kemi një fletëpremtim me të cilin do t’i drejtohemi Hagës për mosmarrëveshjet tona. Çështja e kufirit detar me Shqipërinë është një çështje e zgjidhur me vijën e mesme. Dhe ne dhe shqiptarët kemi shkuar në 12 milje. Dhe aty ku nuk ka 24 milje, dhe për një kohë të gjatë në qytetin tim të Korfuzit nuk ka 24 milje, është vija e mesme. Tani, nëse nevojiten diskutime teknike në kontekstin e apelit të Hagës, ato mund të zhvillohen. Por në parim, mosmarrëveshja me Shqipërinë do të zgjidhet në kuptim të plotë të së Drejtës Ndërkombëtare dhe Konventës për të Drejtën e Detit, UNCLOS: 12 milje, të drejta të plota për ishujt, referim në Hagë për të zgjidhur çdo mosmarrëveshje.
