Ndërkohë që mijëra njerëz po largohen nga Shqipëria, LSI ka menduar që slogani i saj për zgjedhjet të jetë “Më shumë shërbim dhe punësim”.
Ndërkohë të premten, kreu i LSI, Ilir Meta u shfaq sërish në krah të kandidates së PS për Shkodrën, Keti Bazhdari, në një festë të organizuar në Velipojë.
“Pjesëmarrja jua, përkrahja juaj, është një nisje e mrekullueshme, jo vetëm për këtë sezon turistik, por jam i bindur është një nisje e mrekullueshme drejt kurorëzimit të një fitoreje, e cila do të jetë për të gjithë Shkodrën dhe për të gjithë shkodranët do të jetë shprehja e emancipimit më të lartë që Shkodra ka treguar gjatë këtyre dy dekadave në të gjithë jetën politike të vendit. Është meritë e Ketit që Bashkia e Shkodrës ka garën më të bukur në të gjithë Shqipërinë për 21 qershorin. Është hera e parë që në Shkodër, por ndoshta në të gjithë Shqipërinë, që në një bashki kaq të rëndësishme, kemi ballë për ballë dy gra, dy zonja dhe kjo të jeni të sigurt që në radhë të parë është meritë e Ketit, e projektit të saj, e vendosmërisë së saj, për t’i treguar të gjithë shkodranëve dhe të gjithë shkodraneve që Shkodra ka mundësi dhe potenciale të jashtëzakonshme dhe në radhë të parë vajzat, gratë dhe nënat shkodrane”, theksoi Ilir Meta, Kryetar i Lëvizjes Socialiste për Integrim.
Më herët ishte raportuar se deputeti Tom Doshi ishte kundër kandidaturës së Bazhdarit për Shkodrën.
Kjo përpara se ai të deklaronte se Ilir Meta kërkonte ta vriste.
