Kryetari i Kuvendit të Shqipërisë Ilir Meta, gjatë vizitës dy ditorë në Kosovë, vizitoi disa biznese në Kosovë ku u njoh më nga afër me aktivitetin tyre dhe bisedoi për shtrirjen edhe në Shqipëri.
Në këto takime, Meta shoqërohej nga bashkëshortja e tij, njëkohësisht edhe deputete eKuvendit të Shqipërisë, znj. Monika Kryemadhi, Ministri i Bujqësisë, Zhvillimit Rural dhe Administrimit të Ujërave, Edmond Panariti dhe Ambasadori i Shqipërisë në Kosovë, Qemal Minxhozi.
Gjatë vizitës në fabrikën e miellit “Universal Food” në Fushë Kosovë, Meta u takua me pronarin e kompanisë, Ibrahim Aksoy, me të cilin bisedoi për zgjerimin e aktivitetit tregtar të prodhimit të miellit në tregun shqiptar dhe atë ndërkombëtar.Kryetari i Kuvendit e përgëzoi Aksoy për investimin e bërë, ndërsa shprehu bindjen se midis dy vendeve nevojitet ndërtimi i një hekurudhe Durrës-Prishtinë në mënyrë që kostot e prodhimit të këtyre produkteve të ulen si për shtetin e Kosovës, ashtu edhe për tregun e Shqipërisë, i cili do të mund të importonte më shumë mallra nga Kosova.
Fabrika e miellit është një nga më të mëdha në Ballkan e cila është rindërtuar në vitin 2007. Ajo ka një kapacitet deponimi prej 500 ton grurë dhe prodhon rreth 380 ton miell në ditë. Kosto e investimit në këtë fabrikë arrin 22 milionë euro dhe është e lidhur me rrjetin e kompanive “Aksoy Group” e cila ka filialet e saj në Shqipëri dhe Turqi.
Gjatë qëndrimit në Kosovë, Kryetari i Kuvendit, vizitoi dhe Kantinën e verës “Stone Castel” në Rahovec të Kosovës.
Kryetari i Kuvendit uroi pronarin e kantinës për investimin e bërë dhe theksoi nevojën e rritjes së bashkëpunimit mes dy vendeve në mënyrë që produktet e kësaj kantine të eksportohen edhe më shumë tregun shqiptar.
Më pas Meta zhvilloi një vizitë edhe në ambientet e reja të televizionit “Klan Kosova” ku u takua me Drejtorin e Përgjithshëm Baton Haxhiu.
Godina e re e “Klan Kosovës” ishte vendosur në ish-fabrikën e armotizatorëve në Prishtinë dhe ishte ndërtuar tërësisht me materiale të ricikluara. Kryetari iKuvendit, z. Ilir Meta e përgëzoi zotin Haxhiu për investimin e bërë duke theksuar se të tilla ide për të përdorur materiale të ricikluara duhet të vihen në zbatim edhe në Shqipëri pasi ulin koston e investimit si edhe krijojnë ambiente moderne me standarde bashkëkohore.
Kosto totale e investimit ishte 1.2 milion euro dhe 300 mijë euro të tjera ishin në projekt për tu investuar në ambiente të reja. Krahas kësaj, një pjesë e godinës ishte ndërtuar me tullat e shtëpive të djegura gjatë luftës së Kosovë.
