Ka mbetur mister fati i dy shqiptarëve që dyshohet se janë pengje të një marinari egjiptian. Në komunikimin më të fundit me punëdhënësin e tij në Durrës, marinari i huaj ka thënë se e ka shitur anijen për 100 mijë Euro, kurse pengjet i ka lënë të lirë në Aleksandri.
Pengmarrësi egjiptian mund të jetë me probleme mendore dhe dy shqiptaret peng të rrezikuar seriozisht. Në këtë konkluzion ka arritur grupi hetimor që po analizon bisedat e Salam me punëdhënësin e tij.
Marinari egjiptian, Adel Mohamed Salam, i cili ka marrë peng anijen “Çelepia 2” dhe ekuipazhin e saj me dy shqiptar, Luan Memen dhe Dhimitër Malajn, ka komunikuar rregullisht me punëdhënësin e tij, Florian Çelepia.
Në komunikimin e parë ai i ka kërkuar 70 mijë euro, në rast të kundërt do të mbyste anijen së bashku me dy marinarët. Por, një ditë më pas marinari egjiptian në një tjetër komunikim ka pohuar se anijen e ka shitur për 100 mije euro disa personave për të transportuar klandestinë.
Ndërsa dy marinarët shqiptare, njëri prej të cilëve u shfaq lidhur këmbë e duar me zhinxhirë e litarë, do të ktheheshin në Shqipëri. Këto kontakte pronari i anijes, Florian Çelepia, thotë se i ka pasur deri dy ditë më parë me marinarin egjiptian, i cili ishte i punësuar nga ana e tyre tetë muaj më parë.
Te gjitha mesazhet ashtu sikurse edhe numri i telefonit të marinarit egjiptian i janë vënë në dispozicion prokurorisë dhe policisë, por deri me tani ende nuk është bërë i mundur lokalizimi i vendndodhjes së anijes.
“Çelepia 2” u largua nga porti i Durrësit me datën 18 qershor. Katër ditë më vonë autoritetet portuale e shpallën të zhdukur. Prej asaj dite asgjë nuk dihet mbi fatin e Memës dhe të Malajt ndërkohë që familjaret e tyre vazhdojnë të qëndrojnë dyerve të policisë duke kërkuar ndihmë. /ABCNews
