Prokuroria e Tiranës ka mbyllur hetimet për një skemë mashtrimi me Tatimin mbi Vlerën e Shtuar (TVSH), në industrinë e përpunimit të metaleve, skrapit e cila ka shkaktuar një dëm ekonomik në vlerën e rreth 26 milionë dollarëve. Organi i akuzës ka dërguar në Gjykatën e Tiranës listën me emrat e 24 personave dhe subjekteve tatimorë, të akuzuar si të përfshirë në këtë skemë.
Prokuroria i akuzon ata të gjithë për veprën penale të “Falsifikimit të vulave, të stampave ose formularëve” në bashkëpunim që ka sjellë pasoja të rënda. Të përfshirë në këtë skemë mashtruese kanë qenë edhe 14 persona të tjerë, për të cilët është dërguar pak javë më parë kërkesa për gjykim dhe tashmë ka nisur procesi në gjykatë. “Subjektet tregtare, sasitë e skrapit i siguronin në burime dhe në mënyra, krahas grumbullimit të ligjshëm të skrapit, për të cilat ishin të interesuar që të mos i deklaronin në organet tatimore. Për këtë qëllim, mbulimin e burimeve të sipërcituara, administratoret e shoqërive kane krijuar nëpërmjet personave të ndryshëm banorë të qytetit të Tiranës dhe më konkretisht të pandehurit: Agim Xhika, J.K, dhe Maltin Lleshi, shoqëri tregtare me objekt grumbullimin dhe shitjen e skrapit të cilët janë të regjistruar në Qendrën Kombëtare të Regjistrimit dhe në Sistemin Informatik të Tatimeve me aktivitet grumbullim e shitje skrapi.
Nga materiali hetimor ka rezultuar se subjektet tregtare që u shisnin skrapin subjekteve të kategorisë të nivelit te II, të konsideruara për efekt të kryerjes të veprimeve hetimore të kategorisë së nivelit të III, janë regjistruar si në Q.K.R ashtu edhe në organet tatimore në mënyrë fiktive me qëllim tërheqjen e blloqeve me fatura TVSH-je në Drejtoritë Rajonale të Tatimeve dhe përdorimin e këtyre blloqeve duke lëshuar fatura shitje me TVSH fiktive për shitje skrapi për subjektet e kategorisë të nivelit të II. Fiktiviteti i faturës qëndron në faktin se është bërë vetëm lëshimi i faturës tatimore të shitjes për efekt të kreditimit të TVSH-së nga subjektet e nivelit të II pa dërguar në fakt mallin” thuhej në dosjen e prokurorisë.
