Petrit Vasili, kryetar i grupit të LSI-së tha se argumentat e qeverisë nuk janë bindëse
Kryetari i deputetëve të Lëvizjes Socialiste për Integrim qeveritare, Petrit Vasili, kundërshtoi projektligjin për Legalizimet të paraqitur nga ministrja e Zhvillimit Urban dhe Turizmit, Eglantina Gjermeni.
Zoti Vasili kërkoi shpjegime nga ministrja rreth projektligjit duke deklaruar se “argumentat e qeverisë nuk janë bindëse” dhe se “arsye themelore që ne të bëjmë një ligj të ri, që është bërë para 4 vitesh”.
Në përgjigje të kryedeputetit të LSi-së, Vasili, zonja Gjermeni tha se ligji nuk është bërë nga e para, por është rishikuar pasi në formën e parë ishte i pazbatueshëm.
“Ligji nuk është bërë nga e para është i rishikuar, për shkak të ndërhyrjeve klienteliste që i janë bërë herë pas here”-tha ministrja.
Sipas saj, “ligji nuk qëndron në këmbë ndaj ishte e nevojshme rishikimi i tij”, andaj shtoi se , “grupet e interesit e kanë cilësuar si domosdoshmëri ndërhyrjen”.
“Ligji per territorinin ka ndryshuar shumë herë duke sjellë probleme në zbatueshmërinë e tij. Ndryshimet e propozuara synojne ta kthejnë në kohë këtë ligj dhe ta zhveshin nga interesat klienteliste, gjithashtu parashikohet gjithëpërfshirja në hartimin e planeve vendore”, tha ministrja Gjermeni.
“Ky ligj konfiskon ose zhbën ndërtimet pa leje në zonat ku ka plane zhvillimore. Janë shtuar sanksionet për të gjithë individët, që ndërtojnë në kundërshtim me ligjin”, u shpre Eglantina Gjermeni.
Pas pyetjes që i bëri deputetit Bashkim Fino se është marrë në konsideratë ndarja e re territoriale në ligjin për territorin, Gjermeni iu përgjigj:
“Për ligjin e territorit është marrë në konsideratë Reforma Territoriale dhe se ka bashkëpunim mes dy grupeve të punës. Reforma territoriale përmirëson edhe ligjin për territorin, pasi vendoret do të jenë më të kualifikuar.”
Kundërshtimi i sotëm nga Vasili, vjen pas atij të deputetit të LSI-së Luan Rama, i cili pak ditë më parë kundërshtoi projektligjin e qeverisë për karrieren në ushtri. Luljeta Progni
