Harmonia e toleranca fetare, janë dy arsyet kyçe që shpjegojnë udhëtimin e Papa Françeskut në Shqipëri”. Kështu e nis faqja zyrtare e Vatikanit, “L’Oservatore Romano”, shkrimin mbi vizitën e Atit të Shenjtë në vendin tonë. Sipas kësaj faqeje, kjo vizitë ishte shembullore dhe shumë e rëndësishme. E rëndësishme për Shqipërinë, që mori mbështetjen maksimale të Papës, dhe shembullore, për mesazhin që Ati i Shenjtë u dha Europës e botës. Një ditë pas vizitës historike të Papës në Tiranë, “L’Oservatore Romano” e quan të ngrohtë dhe mikpritës fjalimin e Presidentit Bujar Nishani, i cili i prezantoi bashkëkombësit e tij si populli i Nënë Terezës. “Sot nën gjurmët e udhëtimit të Papa Gjon Palit II, pas mbarimit të regjimit ateist, mbështetja e kreut të Vatikanit për Shqipërinë u shfaq sërish. Me një frymëzim të përbotshëm dhe me një dashuri të hapur për popullin shqiptar: ‘me respekt dhe admirim për harmoninë e vëllazërinë fetare për ta çuar përpara vendin’, ashtu siç vetë Ati i Shenjtë zgjodhi të shkruante me dorën e tij porsa nisi vizita”, thuhet në shkrimin e “L’Orservatorio”. Më tej, në shkrim sqarohet se Papa është përgatitur për dy muaj me radhë mbi udhëtimin e tij të parë në Europë. “Të tria përkatësitë fetare kanë dhënë dëshmi para Zotit dhe tani po japin dëshmi për vëllazëri midis tyre, – ka përmbledhur Papa përpara gazetarëve gjatë rrugës së kthimit”, raporton “L’Oservatorio Romano”.
Shkrimi mbyllet me mallëngjimin që përjetoi Papa gjatë rrëfimit të të mbijetuarve të komunizmit. “Përpos fjalëve të shenjta të udhëtimit në Shqipëri, në histori do të mbetet edhe mallëngjimi e lotët e Papës përballë historisë së rrëfyer thjesht e në mënyrë prekëse të dy të mbijetuarve të regjimit mizor e persekutimit komunist: një prift 84-vjeçar, Don Ernest Simoni dhe një besimtare 85-vjeçare, Suor Marije Kaleta, të cilët i shpëtuan vdekjes pas dhjetëra vitesh burgim dhe punë të detyruar. Sot ‘kemi prekur martirët’, komentoi Papa i prekur thellë, duke shtuar se të ngushëlluarit nga Zoti gjatë persekutimit, ishin ata që na ngushëlluan edhe ne”, – përfundon artikullin, “L’Oservatore Romano”.
