Versione të tilla të paautorizuar që rrëfejnë jetën time më kanë detyruar të përgjigjem me një libër. Në fillim të procesit penal ndaj meje, dikush më tha një shprehje të vjetër sipas së cilës “Kur tregohet historia e jetës tënde, sigurohu që të jesh ti ai që e mban stilolapsin”. Pra … jam unë tani që e mbaj stilolapsin dhe jam i detyruar të tregoj një kapitull të trazuar të jetës sime”, – është shprehur sëfundmi për mediat amerikane, Diveroli, raporton “BalkanWeb”. “BalkanWeb” ka siguruar gjithashtu dhe disa foto ku ishkontrabandisti i armëve shfaqet teksa bën të njëjtën jetë luksoze si ajo para se të burgosej.
Lidhjet me Shqipërinë
Efraim Diveroli, trafikanti amerikan i armëve, kompania e të cilit arriti disa vjet më parë të siguronte një kontratë 300 milionë dollarëshe me Departamentin amerikan të Mbrojtjes, u dënua me 4 vjet burgim. Emri i tij është i lidhur ngushtësisht me “Gërdecin”, një nga tragjeditë më të mëdha të ndodhur gjatë viteve të pluralizimit në Shqipëri, ku humbën jetën 26 vetë dhe u plagosën mbi 300 të tjerë. Në vitin 2011 ai u dënua me katër vite burg për shitjen e miliona municioneve kineze të ndaluara Pentagonit për t’u përdorur nga forcat afgane.
Në një marrëveshje me organet e drejtësisë, Diveroli pranoi se në vitin 2007 pati planifikuar bashkë me punonjësit e kompanisë me bazë në Miami, AEY, për t’i shitur ushtrisë amerikane municione të ndaluara kineze me vlerën e 10, 3 milionë dollarëve, të cilat ata u përpoqën t’i paraqisnin sikur të ishin prodhuar në Shqipëri.
Ky veprim shkeli embargon e vendosur në vitin 1989 nga Kongresi amerikan ndaj armëve të prodhuara në Kinë, pas masakrës ndaj studentëve kinezë në sheshin Tienanmen të Pekinit. Diveroli është njëherazi njeriu që denoncoi lidhjet me trafikun e armëve edhe të një njeriu të pushtetshëm në Shqipëri, që sipas përshkrimeve u përfol se ishte Shkëlzen Berisha, djali i ish-kryeministrit shqiptar Sali Berisha.
“Kjo ka shkuar lart e lart tek Kryeministri dhe i biri. Unë nuk mund ta luftoj dot këtë mafie. Është shumë e madhe. Ata kafshë kanë dalë jashtë kontrollit”, kështu do të shprehej Efraim Diveroli në një bisedë me Kosta Trebicka, i cili do të humbte jetën në një aksident tragjik në zonën e Lekasit në Korçë, pak kohë pas tragjedisë së Gërdecit. Por çdo aludim për përfshirjen e tij në një trafik të mundshëm armësh është hedhur poshtë në disa raste nga djali i Berishës.
Libri dhe filmi
As Hollivudi nuk e la në harresë Efraim Diverolin. Skandali që përfshiu Shqipërinë e Pentagonin bashkë u shndërrua në një subjekt filmi, që tashmë e ka dhe një emër. “Arms and the Dudes” (Armët dhe Çunat) ka përcjellë përmes ekranit të madh historinë e jashtëzakonshme të të riut dhe miqve të tij amerikanë që arritën të firmosnin një mega-kontratë 300 milionëshe për armatosjen e ushtrisë afgane. Filmi u bazua mbi librin me të njëjtin titull të gazetarit investigativ amerikan Guy Lawson.
