Personi që dëshmoi kundër Arben Frrokut do strehohet në një vend të fshehtë në BE
Dëshmitari kyç i prokurorisë që ka parë Arben Frrokun në automjetin nga i cili u qëllua me breshëri kallashnikovi kryekomisari Dritan Lamaj, është larguar nga Shqipëria. Fatmir Vladi, që u identifikua nga i pandehuri Arben Frroku, pasi më parë kishte një emër të rremë të vendosur nga drejtësia, ka udhëtuar me familjen në një nga shtetet e BE-së, ku do të strehohet bashkë me familjen. Burime nga policia thanë se lëvizja e Vladit është bërë me lejen e autoriteteve shqiptare, ndërsa prej disa javësh ai nuk ndodhet në Shqipëri. Por, policia vazhdon ndërkohë të mbajë në mbrojtje të afërm të tij. Mësohet se një prej vëllezërve të Vladit është larguar në janar jashtë shtetit, pa lejen e autoriteteve shtetërore. Kjo familje, sipas policisë është sulmuar edhe me lëndë eksplozivi, ku një sasi C4 i është gjetur Vladit poshtë automjetit të tij. Në lidhje me dëshmitë, akuza thotë se ka administruar rrëfimin e tij dhe të bashkëshortes. Në të dyja deklarimet e dëshmitarëve, qëndron pohimi se ata e kishin parë Arben Frrokun në makinën nga u qëllua ish-kryekomisari i Kombinatit. Dëshmia e shtetases Liza Ndoka (identitete të ndryshuara), është marrë me anë të video-konferencës, ndërsa mësohet se ashtu edhe si bashkëshorti, ajo ka dëshmuar se ka parë autorët e vrasjes së kryekomisarit. Sipas dëshmisë, njëri prej tyre ishte i pandehuri Frroku. Nga ana tjetër, dëshmitares i janë bërë pyetje të shumta nga i pandehuri dhe avokatët e tij. Në dëshminë e tij, Arben Ndoka, me emrin e vërtetë me inicialet Fatmir Vladi, tha se e kishte njohur Frrokun në automjetin tip BMW, nga e cila u lëshua breshëria e plumbave mbi automjetin “Lançia”, ku qëndronte Lamaj. Dëshmitari i mbrojtur rrëfeu me anën e një video-konference se e kishte parë Frrokun në makinën me tre persona. Ai shpjegoi detaje nga pasditja e 24 shkurtit 2013, ndërsa rikonfirmoi se gjithçka ka zgjatur pak sekonda. Vladi ka qenë shumë afër automjetit të viktimës dhe të autorëve, duke parë gjithçka ndodhi, fillimin e breshërisë së plumbave dhe rënkimin e viktimës, i cili ndërroi jetë gjatë transportit në spital, për shkak se mori 11 plagë. Prokuroria e Krimeve të Rënda i ka administruar dëshmitë e bashkëshortëve si provë kryesore për akuzën ndaj Arben Frrokut. Ky i fundit, në deklarimet e tij, është shprehur se ka prova filmike, ku shfaqet në bizneset e tij, në momentin kur ka ndodhur vrasja.
