Nxënësit e shkollave 9-vjeçare dhe të mesme janë lënë në dorë të mësuesve jashtë profilit, pa arsimin përkatës apo mësues që nuk i realizonin kurrë orët e tyre. Bazuar në inspektimin dhe monitorimin e komisioneve të Ministrisë së Arsimit dhe Sportit, faktet tronditëse u bënë të ditura nga ministrja Nikolla, e cila raportoi për rreth 4 mijë mësues, të cilët janë punësuar në arsim, por nuk e meritojnë vendin që kanë. Ajo bëri të ditur se fati i tyre nuk do të jetë ky që kanë aktualisht, por do të ketë pezullime apo transferime, në mënyrë që çdo mësues të jetë në profilin e vet. Ministrja Nikolla në fjalën e saj theksoi se “nga inspektimi i bërë nga MAS janë gjetur 2065 mësues jashtë profilit të tyre dhe 1984 mësues pa arsimin përkatës. Kjo është shokuese. Ne do të punojmë për të transformuar realitetet. Sigurojmë çdo prind e çdo nxënës se para çdo fëmije do çojmë mësuesit që ata meritojnë, duke ofruar cilësi në çdo shkollë. Nuk e masim punën tonë me “sa keq e gjetëm sektorin”, por se çfarë do bëjmë. Rruga jonë i takon përgjegjësisë, duke drejtuar së pari gishtin te vetja, e duke dhënë llogari”, – tha ministrja Nikolla. Ministrja vuri theksin tek reforma në arsim, duke u shprehur se në çdo klasë do të ketë mësues të profilit përkatës, të cilët do të ofrojnë cilësi në mësimdhënie. “Kryefjala ka qenë dhe mbetet përmirësimi i shërbimit për 532 mijë përfituesit e drejtpërdrejtë në sistemin e arsimit shqiptar dhe ngritjen e një sistemi solid për të tjerët që vijnë. Ndaj ne u angazhuam dhe realizuam inspektimin e plotë të cilësisë së burimeve njerëzore në shkollat tona, sepse asnjë reformë nuk është e mundur pa mësues që ofrojnë cilësi”, tha Lindita Nikolla. Brenda dhjetorit të këtij viti do t’i jepet fund situatës me mësues jashtë profilit në shkolla dhe do të bëhet edhe licencimi i mësuesve, proces ky i cili do të përmbyllet në maj të 2015. “Do të realizojmë provim kombëtar për të gjithë aplikantët që kane aplikuar në portalin tonë. Ky testim do të monitorohet nga MAS. Deri në dhjetor do t’i japim fund historisë së mësuesve pa arsimin përkatës. Do të publikojmë dhe kalendarin për mësuesit. Sepse do të licencohen të gjithë mësuesit që janë në sistem”, – tha Nikolla.
“Duhet të punojmë shumë për të ndryshuar situatën. Ka pasur emërime pa kriter, me mësues që kanë shmangie nga profili. Ndërkohë që kemi evidentuar edhe mësues pa arsimin përkatës, të pa licencuar. Në shkolla nga buxheti i shtetit janë shpenzuar para për më shumë orë mësimi, por këto orë nuk janë realizuar, ndërsa mësuesit ishin paguar me orë të plotë. 2065 mësues janë jashtë profilit. Problematike paraqitet situata në Librazhd, Gjirokastër, Përmet”, – u shpreh Ministrja Nikolla. Por, sistemi arsimor, duke u parë në marrëdhënie zinxhir, me trinomin mësues, prindër, nxënë është komentuar nga ministrja e Arsimit, si një proces i cili do të riformatohet dhe fati i keq i pezullimit të mësuesve jashtë profilit, do të konsiderohet si fat i mirë për 532 mijë nxënës dhe prindërit e tyre. Ndërkaq u bë e ditur se do të hapet shkolla e drejtorëve, e cila do të jetë një tjetër mbështetje që do t’i jepet mësuesve, të cilët duan të bëhen drejtues”, tha ministrja. Ne, vijoi Nikolla, “do t’i japim fund brenda dhjetorit kësaj situate me mësues jashtë profilit. Do licencohen të gjithë mësuesit që janë në sistem dhe janë konform profesionalizimit të tyre. Deri në muajin maj të vitit të ardhshëm do të përmbyllet procesi i licencimit të mësuesve, duke krijuar data-basen e nevojshme për të bërë transparent këtë proces”.
Provimi kombëtar
Në 30 nëntor do të krijohet një portal kombëtar për të pritur të gjithë aplikantët për mësues. Në 30 dhjetor do të realizohet provimi kombëtar për të gjithë aplikantët, sipas profilit të tyre dhe qarkut të përzgjedhur. Nga 1 janari do të nisë rekrutimi i mësuesve vetëm sipas parimit meritë-preferencë.
Në dhjetor do të krijohet një kalendar për marrjen e licencës së mësuesit. Në muajin maj do të përmbyllet licencimi, ndërsa në qershor do të krijohet database kombëtare e mësuesve.
Raporti
Nisma ka filluar të zbatohet një vit më parë për organizmin e sistemit parauniversitar, kurrikulën, sistemin e sigurimit të cilësisë dhe zhvillimit profesional të punonjësve arsimorë. Fillimisht u përzgjodhën me konkurs drejtorët e 13 drejtorive Arsimore Rajonale dhe 25 zyrave Arsimore. 26867 mësues të 1726 shkollave 9-vjeçare dhe të mesme votuan mbi performancën e drejtorëve. Nga 3064 mësues në atestim, 345 prej tyre morën vlerësim të dobët dhe kalueshmëria në vitin 2014 doli 88.7 për qind nga 96 që ishte një vit më parë.
Në muajin gusht u krye inspektimi i 38 njësive arsimore vendore ndërsa në muajin tetor u monitoruan aktet nënligjore me qëllim identifikimin e problematikës, në raport me cilësinë e burimeve njerëzore dhe krijimin e mundësisë për hartimin e një Plani Kombëtar për korrigjimin e këtyre problematikave.
Monitorimi synonte identifikimin e nivelit arsimor të mësuesit, nëpërmjet të cilit do të nxirrej numri i atyre pa arsim përkatës, pa provim shteti dhe mësuesit jashtë profilit. Në total, në 11 ditë monitorimi në të gjithë vendin dolën faktet dhe problematikat, të cilat u prezantuan ditën e djeshme. Nga të dhënat rezulton se ka mësues që kanë mbaruar studimet për Matematikë apo Histori dhe japin mësim në lëndën e Edukimit Fizik. Mësues që kanë mbaruar studimet për Edukim Fizik japin mësim në lëndët TIK dhe Edukim Figurativ.
Shifra
1184 mësues më tepër sesa nevoja në ngarkesën mësimore. Gjithashtu, rezulton se ka mësues, të cilët edhe pse nuk kanë dhënë asnjë orë mësimi, paguhen me pagë të plotë dhe ka shkolla ku punojnë 21 mësues në vend të 14 mësues që nevojiten.
Kryeministri premton reformë radikale në arsimin parauniversitar. Deri në qershorin e vitit 2015 do të ketë një sistem me bazë të dhënash për çdo mësues të Shqipërisë, me kreditit përkatëse
Në janar, vetëm me licenca
Shifrat dje u bënë konkrete, ndërkohë që prej mëse një viti ishte përfolur problematika e arsimit. Jo vetëm nga rezultatet e nxënësve a standardit të shkollave, por edhe për mësuesit e punësuar në sektorin e arsimit. Bazuar te rezultatet, edhe reforma e ndërmarë do të jetë e thellë. Kështu, nga janari i vitit 2015 do të nisë licencimi mësuesve, të cilët do t’i nënshtrohen provimit përkatës, proces ky i cili do të përmbyllet në muajin maj. Kryeministri Rama tha se me realizimin e këtij procesi, në muajin qershor do të përgatitet një sistem database për secilin mësues, ku do të shënohen vitet e punës si dhe kreditet përkatëse. “Pasi të mbyllet faza e parë deri në fund të dhjetorit për të pastruar sistemin dhe për të larguar mësuesit pa arsim përkatës e ata jashtë profilit, ne do të hyjmë në fazën e licencimit të çdo mësuesi të Republikës së Shqipërisë. Fati i mësuesve nuk mund ta varet as nga partia që fiton a humb zgjedhjet, as nga drejtori i zyrës apo i rajonit , por duhet të varet vetëm nga aftësitë e veta të provuara përmes provimit kombëtar dhe të mishëruara në licencën e mësuesit, bashkë me kreditet e marra nga provimi. Duhet të rilindim autoritetin e mësuesit. Si mundet ne që dikë që ka studiuar gjermanisht ta vëmë mësues të gjuhës angleze. Këto gjëra do ishin për të qeshur me të madhe, nëse nuk do ishin realiteti dramatik sot. E ndërsa bëhen transferime nga më të ndryshmet. Dhe këto janë gjëra që kanë ndodhur çdo vit. Jemi këtu për të përcaktuar ilaçet sado të hidhura, që të kurojmë dhe shërojmë sistemin nga kjo sëmundje. Nuk i trembemi hidhësisë së ilaçit, kur e dimë se ai është i duhuri. Të jesh mësues nuk është vend pune, është mision. Deri në qershorin e vitit 2015 do të ketë një sistem me bazë të dhënash për çdo mësues të Shqipërisë, me kreditit përkatëse. E shoh me entuziazëm edhe idenë për shkollën e drejtuesve të shkollave”, – tha kryeministri Rama.
“Rezultatet e raportit për burimet njerëzore në arsimin parauniversitar në vend janë alarmante dhe turpëruese. Gjetëm mësues ma arsim e jashtë profilit. Do bëjmë transformim rrënjësor për vendin. Nuk mund të ecim përpara me të shkuarën. Reforma në arsim është një proces që duhet të vijojë pa limit. Në arsimin parauniversitar ne do të bëjmë revolucion. Në këtë sistem duhet të vrapojmë, dhe operacioni duhet radikal dhe pa mëshirë, se këtu nuk luhet fati i një qeverie, por i një gjenerate të tërë, i të ardhmes së vendit”, – tha Rama.
“Sot jemi në një moment shumë kritik, sepse nuk mund të tolerojmë që fillimi i vitit 2015 të jetë vazhdim i vitit që po mbyllet si pjesë e një zinxhiri të gjatë vitesh ku në Shqipëri është cenuar drejtpërdrejt e ardhmja e mijëra fëmijëve të pafajshëm në Shqipëri, për dy arsye; nga njëra anë klientelizmi politik dhe nga ana tjetër korrupsioni”,
“Asnjë mësues pa arsim përkatës, asnjë mësues jashtë profilit të mos mundet t’i marrë më shtetit përmes taksave të shqiptarëve asnjë rrogë duke filluar nga janari i ardhshëm”, – u shpreh kryeministri.
