Nga Daut Dauti
Dje (29 mars 2016) ambasadori i Britanisë së Madhe në Kosovë, Ruairí O’Connell, së bashku me një grup të gazetarëve dhe strukturave udhëheqëse të komunës së Vitisë kanë përkujtuar 15 vjetorin e vrasjes së gazetarit Kerem Lawton. Kjo ngjarje është dashur të trajtohet si e rëndësishme nga mediet e Kosovës por ajo u injorua në masë të konsiderueshme.
Kur u vra Kerem Lawton (29 mars 2001) unë kam qenë sekretar i Shoqatës së Gazetarëve të Kosovës dhe me këtë rast shoqata organizoi një mbledhje komemorative në të cilën morrën pjesë shumë gazetarë për të shprehur dhembje për kolegun e tyre por edhe brengosje për mungesën e sigurisë gjatë ushtrimit të profesionit. Pjesa kryesore e fjalimit tim ka qenë kërkesa që të zbardhet kjo vrasje. Pyetjet që ia kam parashtruar pushtetit të atëhershëm, UNMIK-ut por edhe KFOR-it, kanë qenë: Pse, si dhe kush e vrau gazetarin Kerem Lawton?
Akush, asnjëherë nuk ka dhënë ndonjë spjegim. Pasi që ende nuk kemi përgjigje, të njejtat pyetje duhet t’i parashtrojmë edhe sot. Duhet përkujtuar që në fshatin Krivenik, së bashku me gazetarin britanik Kerem Lawton, u vranë edhe 3 njerëz tjerë kurse u plagosën së paku 30 veta. Vrasjet qenë bërë si rezultat i gjuajtjeve artilerike që erdhën nga forcat ushtarake të Maqedonisë. Ato kanë gjuajtur nga një territor shtetëror (Maqedoni) në tjetrin (Kosovë) dhe një gjë e tillë është tërësisht kundër të gjitha ligjeve dhe rregullave të luftës. Gjuajtjet artilerike të forcave maqedone që rezultuan me fatalitet të lartë janë edhe më joligjore pasi që ato për cak kishin popullësinë civile në një vend ku nuk kishte prezencë të forcave ushtarake kundërshtare.
Sipas të gjitha kritereve shohim se në këtë rast kemi të bëjmë me krime të luftës ndaj popullsisë civile. Për këtë arsye dikush në zingjirin komandues të ushtrisë maqedone duhet të ofroj llogari. Kanë kaluar 15 vite nga koha e kryerjes së krimit por duhet patur parasyshë që krimet e luftës nuk i nënshtrohen parimit të vjetërsisë.
