Ish-zëvëndësdrejtori i Policisë së Shtetit reagon pas padisë penale ndaj tij për ngjarjen e 21 janarit
“Hakmarrje politike e Saimir Tahirit”, e ka cilësuar Agron Kuliçaj, padinë që ministria e Brendshme ka paraqitur në prokuri ndaj tij.
Në një intervistë për news 24, ish-zvdrejtori Policisë së Shtetit, reagoi pas kallëzimit penal ndaj tij, bërë nga drejtuesit aktual të këtij institucioni.
Ai tha se ky kallëzim është një hakmarrje politike për gjyqin që ka pasur me ministrin e Brendshëm, Saimir Tahiri.
“Unë jam i hapur për prokurorinë. Por, urdhërat janë zbatuar në kohë, nuk u cënuan afatet. Kallëzimi ndaj meje është një tentativë për hakmarrje politike. Hakmarrja vjen për shkak të funksionit që kam mbajtur, por dhe gjyqit që kam pasur me Saimir Tahirin. Do paraqitem në prokurori dhe do jem bashkëpunues”, tha Kuliçaj.
Akuza ndaj Kuliçjat dhe ish-drejtorit të Policisë së Shtetit Hynsi Burgaj, lidhet me ngjarjen e 21 janarit.
Padia ndaj dy ish-zyrtravë të lartë të këtij institucioni, është bërë pasi ata dyshohet se nuk kanë zbatuar detyrën për sa kohë nuk iu bindën në atë kohë urdhërit të Prokurorisë për të ndaluar gjashtë oficerë të Gardës së Republikës.
Sipas kallëzimit ishin personat përgjegjës që duhet t’i përgjigjeshin pozitivisht Prokurorisë së Tiranës në kohën kur ajo lëshoi gjashtë urdhëra ndalimi për oficerë të Gardës që kërkoheshin jo vetëm për t’u pyetur, por edhe dyshoheshin se kishin qëlluar ndaj protestuesve.
