Qeveria e Kosovës ua ka tërhequr vërejtjen komunave veriore të Kosovës, se e diela është ditë e fundit (8 mars) kur kalon afati i miratimit të buxhetit dhe se nëse ato nuk e bëjnë këtë, atëherë do të ndërmerren masat e jashtëzakonshme ndaj tyre, duke mos përjashtuar as organizimin e zgjedhjeve të reja.
Sipas shkresës që Ministria e Administratës së Pushtetit Lokal u ka dërguar komunave veriore, nëse projektbuxhetet nuk harmonizohen me rekomandimet e Ministrisë së Financave dhe nuk miratohen deri të dielën, mund të pasojnë masat e jashtëzakonshme, përfshirë edhe organizimin e zgjedhjeve të reja për pushtetin lokal në ato komuna.
Duke shpërfillur kërkesën e MAPL-së, komunat veriore kanë porositur Prishtinën, se projektbuxhetet janë miratuar në shtatorin e vitit të kaluar dhe se ato me kohë i janë dorëzuar Prishtinës, duke vlerësuar tutje, se tërheqja e vërejtjes nga Prishtina, është tentim për destabilizimin e proceseve politike në Kosovës dhe i dialogut të Brukselit.
Kuvendi i Mitrovicës së Veriut, sipas KsenijaBozhoviq, kryesuese, dy herë e ka miratuar propozimbuxhetin për vitin 2015, herën e dytë me vërejtjet që kishin ardhur nga Ministria e Financave e Republikës së Kosovës dhe se janë dorëzuar brenda afateve ligjore.
“Është e qartë se për këtë buxhet duhet të ketë zgjidhje politike dhe të vendoset në nivelin më të lartë e pastaj t’i dorëzohet Kuvendit për shqyrtim”, ka thënë Bozhoviq. Sipas saj, Prishtina përsëri kërkon që propozimbuxhetet e katër komunave veriore, të përmbajnë edhe ingerenca të caktuara financiare, siç janë ato në fushën e arsimit dhe të shëndetësisë, e që për komunat veriore vlerësohet të jetë e papranueshme, pasi që këto dy fusha dëshirojnë të mbesin në kompetenca të Bashkësisë së Komunave Serbe. Shkresa (porosia) e komunave veriore u ka shkuar nga Ministria e Administratës së Pushtetit Lokal, ministri i së cilës, sikurse edhe përfaqësues tjerë serbë, e ka ngrirë pjesëmarrjen e tij në institucionet kosovare, për shkak të vendimit të kryeministrit, Isa Mustafa, për shkarkimin e ministrit, AleksandërJabllanoviq, transmeton Zëri.
Ndërkaq, ministri i Ministrisë së Administratës së Pushtetit Lokal, LubomirMariq, u ka thënë medieve në veri, se një mesazh i tillë nga Prishtina, “përjetohet te qytetarët e veriut të Kosovës si kërcënim, provokim i situatës, e cila tani është shumë e komplikuar”. Sipas ministrit, Mariq, arsimi dhe shëndetësia janë fusha mbi të cilat ingerencat duhet t’i ketë BKS-ja, ndërkohë që formimi i BKS-së ende nuk ka ardhur në rend dite në dialogun në Bruksel. Në këtë mënyrë, Lista “Srpska” ka vlerësuar se tërheqja e vërejtjes nga Prishtina për buxhetet e komunave veriore, mund t’i destabilizojë proceset politike në Kosovë dhe dialogun e Brukselit.
Në anën tjetër, kryetarët e katër komunave veriore të Kosovës kanë shprehur pakënaqësinë e tyre me ndarjen e buxhetit nga Qeveria e Kosovës dhe për këtë arsye, ata kanë kërkuar që kjo çështje të diskutohet në Bruksel, gjë që është absolutisht e papranueshme për Qeverinë e Kosovës.
Kryetari i Mitrovicës së veriut, GoranRakiq, ka deklaruar se Kuvendi i Mitrovicës së veriut nuk do ta ndryshojë buxhetin, të cilin e ka miratuar në shtatorin e vitit të kaluar, e i cili është 21 milionë euro. Me qarkoren e Ministrisë së Financave, buxheti që i është ndarë Komunës Veriore të Mitrovicës është vetëm 2.7 milionë euro. Rakiq u ka thënë medieve se Qeveria qendrore nuk mund të përzihet në punën e komunave veriore.
“Si mund të jetë puna e Kuvendit e pavarur kur përzihet Qeveria qendrore dhe për ç’arsye duhen kuvendarët, atëherë. Nuk po e kuptoj hiç se si po mendojnë ata ta decentralizojnë pushtetin kur ndërhyjnë në punën e katër komunave të veriut të Kosovës”, ka pyetur ai.
Ndërkaq, nga Ministria e Financave e Republikës së Kosovës, bëhet e ditur se komunat veriore nuk mund ta bëjnë asnjë shpenzim të buxhetit, pa e miratuar në kuvendet e tyre dhe atë sipas rekomandimeve dhe qarkores së Ministrisë së Financave, siç e kanë bërë të gjitha komunat e Kosovës.
Ndryshe, katër komunat veriore të Kosovës, Mitrovica e veriut, Zveçani, Leposaviqi dhe Zubin Potoku, në shtatorin e vitit 2014, kanë miratuar projektbuxhetet që bashkërisht është 67.5 milionë euro dhe atë ia kanë dorëzuar Qeverisë së Kosovës. Që të katër komunat kanë dalë nga korniza e lejuar e buxhetit e që sipas qarkores, që u është dërguar të gjitha komunave të Kosovës, për katër komunat veriore është 8.5 milionë euro.
