Banorët thonë se u nxorën me dhunë jashtë, vetëm me rrobat e trupit, duke u lënë kështu nën mëshirën e fatit më shumë se 20 banor në këtë ditë me shi.
Shtëpitë e tyre brenda gjysmë orë u rrëzuan pas një vendimi të Komunës së Prishtinës me arsyetimin se 5 shtëpitë nuk kanë pasur leje ndërtimi.
Jeton Gërbeshi, babai i të cilit ishte invalid i luftës e axha veteran i UÇK’së, rrëfen se si Komuna e Prishtinës i rrënoi shtëpinë për të cilën ai thotë se e ka ndërtuar me kredi të cilën duhet ta paguaj për dhjetë vitet e ardhshme.
https://dailymotion.com/video/x4x4h5p
“Shtëpinë e kemi ndërtua që pesë muaj. Kemi hy në të me familje. Kanë ardhë komuna dy herë, sot në orët e hershme të mëngjesit kanë ardhë dhe mu më kanë arrestu, familjarët e tjerë zhag mi kan qitë prej shtëpisë, gruan fëmijët dhe plakën zhag i kanë qitë policia”, rrëfen ai.
Ai pranon se nuk ka pasur leje për ndërtimin e shtëpisë nga Komuna e Prishtinës, ndonëse disa herë thotë se ka kërkuar ndihmë në komunën e Prishtinës që t’i gjendet strehim.
“Jemi dhjetë anëtarë në familje, jetonim në dy shtëpi. Por sot ato u bënë shkrumb e hi nga Komuna”, tregon ngjarjen Jeton Gërbeshi të cilit komuna ia rrënoi sot shtëpinë.
E pas largimit të dhunshëm nga shtëpia, Jeton Gërbeshi mori familjen 10 anëtarëshe e i gjeti strehim në banesat në Hajvali, por edhe nga aty familja e tij u dëbua jashtë, duke mbetur kështu në rrugë.
“Na qitën edhe prej ktyre banesave. Sulm në zemër kam pas tre herë vetëm nga këto probleme”, tregon ai duke thënë se natën do ta kalojnë pa kulm mbi kokë.
E zonja 70 vjeçare me lot në sy rrëfen se si policia i largoi nga shtëpia.
“Çka me thanë unë oj loke. Këso ndodhish as në regjimin e Milloshevicit nuk kam pa. Ku ti lë tash këta fëmijë”, thotë me lot në sy 70 vjeçarja.
Pa shtëpi mbeti sot edhe familja e Egzon Gashit 18 vjeçar. Shtëpia e kësaj familje ishte në grupin e pesë shtëpive4 të rrënuara sot nga Komuna e Prishtinës.
“Vetëm sa e kam përfundu shkollën e mesme. Pata shumë ëndrra për shtëpinë, regjistrimin në fakultet, me punu ndojë punë. Por krejt këtu mu rrënuan sot. Mbetëm jashtë”, tregon ai.
Ai thotë se Kreu i Prishtinës, Shpend Ahmeti me këto veprime po i detyron qytetarët e Kosovës ta braktisin vendin.
“Shpend Ahmeti bashkë me komunën e Prishtinës e lëvizjen Vetëvendosje, po i detyron njerëzit ta lëshojnë Kosovën’, thotë 18 vjeçari nga Prishtina.
Ndërkohë komuna e Prishtinës gjatë mëngjesit të së mërkurës rrënoi pesë shtëpi pa leje në lagjen periferike të komunës së Prishtinës.
