Komisioni hetimor parlamentar vendosi t’i propozojë Kuvendit shkarkimin e dy anëtarëve të Këshillit të Lartë të Drejtësisë, Elvis Çefa dhe Lulzim Lelçaj, duke i akuzuar ata për shkelje kushtetuese dhe ligjore gjatë veprimtarisë së tyre në këtë institucion.
Deputetët e maxhorancës propozuan që në raportin i cili do t’i dërgohet Kuvendit, të evidentohet edhe përgjegjësia e Presidentit të Republikës si kryetar i Këshillit të Lartë të Drejtësisë.
Sipas anëtarëve të maxhorancës në komision, dy anëtarët e emëruar nga Parlamenti në Këshillin e Lartë të Drejtësisë u gjetën fajtorë për të gjitha akuzat e ngritura nga 39 deputetët e shumicës që kërkuan shkarkimin e tyre.
Shkeljet e evidentuara shkojnë nga konflikti i interesit deri te vonesat, apo emërimet jashtë kritereve të gjyqtarëve dhe kryetarëve të gjykatave.
Por sipas komisionit, përgjegjës për këtë situatë është edhe Presidenti i Republikës si kryetar i KLD-së.
Pasi përfshinë edhe Presidentin e Republikës nën akuzë, deputetët e mazhorancës u hodhën në sulm ndaj Këshillit të Lartë të Drejtësisë si i tërë, duke e quajtur atë një bandë.
Një ditë më parë Presidenti Bujar Nishani gjatë mbledhjes së Këshillit të Lartë të Drejtësië e cilësoi intimidim ndaj këtij institucioni hetimin e parlamentit ndaj dy anëtarëve të këtij institucioni Elvis Çefa e Lulzim Lelçaj. Edhe demokratët reaguan përmes nënkryetarit të Komiisonit të ligjeve, duke e clësuar vendimin e komisionit hetimor për shkarkimin e dy anëtarëve të Këshillit të Lartë të Drejtësisë, fundi i pavarësisë së gjyqësorit.
Oerd Bylykbashi: “Me vendimin e sotëm për të miratuar raportin që gjykon mbi punën e KLD dhe propozon ndërprerjen e mandateve kushtetuese të anëtarëve të saj, ky komision shkel rëndë pavarësinë e pushteteve dhë thyen Kushtetutën. Akti i sotëm i komisionit të hetuesisë parlamentare, është një nga aktet më të rënda të shkeljes së Kushtetutës dhe parimit të ndarjes së pushteteve. Me një ligj antikushtetues duke i dhënë fuqi prapavepruese, dhe duke shkelur me të dyja këmbët vendimet e Gjykatës Kushtetuese për ndarjen dhe pavarësinë e pushteteve, Rama dhe Meta po uzurpojnë edhe drejtësinë”.
Raporti i miratuar nga deputët e shumicës në komisionin hetimor do t’i dorëzohet kryetarit të Parlamentit ditën e hënë dhe sipas rregullores së Kuvendit ai duhet të votohet brenda 10 ditësh në seancë plenare.
