Ministrja e Mbrojtjes, MimiKodheli, e shoqëruar nga shefi i Shtabit të Përgjithshëm të FA-së, gjeneral major Jeronim Bazo, ishte sot në Komandën e Mbështetjes, ku u takua me efektivin e Batalionit të Logjistikës.
Me këtë rast, Kodheli falenderoi trupat e këtij Batalioni për angazhimin e tyre në operacionin për përballimin e përmbytjeve të shkaktuara ditët e shkuara në disa zona në Jug të vendit.
Ministrja e Mbrojtjes gjithashtu vlerësoi kontributin e dhënë nga ky repart gjatë këtij viti, duke u ndalur posaçërisht tek angazhimi i tyre në operacionin për dërgimin e municioneve nga Shqipëria në ndihmë të qeverisë së Irakut, krah aleatëve.
“Ka qenë angazhimi dhe puna juaj që e ka bërë Shqiperinë të ndjehet krenare dhe mua personalisht të marr vlerësimet më të larta nga partnerët tanë në takimet bilaterale që kam zhvilluar”, tha Kodheli.
Më tej, Kodheli garantoi për vullnetin e palëkundur të qeverisë shqiptare për të përmirësuar gjithnjë e më shumë kushtet e jetesës dhe të punës së ushtarakëve. Ajo u ndal sidomos tek vendimi i fundit i Këshillit të Ministrave për disa ndryshime në Vendimin nr. 668, datë 7.8.2013 të KM “Për trajtimin me ushqim të ushtarakëve të FA të RSH “dhe për disa ndryshime në Vendimin nr. 524, datë 30.7.2004, të KM për masën dhe mënyrën e kompensimit të qirasë së banesës dhe të ushqimit të ushtarakëve të FA të RSH”, të ndryshuar.
“Korriku i vitit 2013, theksoi ajo, e gjeti Forcën e Armatosur me një vendim, i cili dëmtonte cilësinë e jetës dhe të punës, por edhe dinjitetin e ushtarakëve. Një vendim i marrë me synimin për të mbushur gropat e errëta të buxhetit të mbrojtjesduke hequr trajtimin me ushqim të ushtarakëve”.
“VKM e korrikut të vitit 2013, në pjesën më të madhe të tij ka qenë e pazbatueshme. Qeveria e shkuar jo vetëm që u hoqi ushqimin një pjesë të Forcave të Armatosura, por edhe aty ku e lanë e bënë të pazbatueshëm.
Qeveria aktuale ka menduar ta zgjidhë këtë pjesë duke bërë kompensimin në lekë aty ku është e pazbatueshme”, ka nënvizuar ministrja Kodheli.
“Ky është hapi i parë drejt përmirësimit të mëtejshëm që do i bëjmë efektivëve të Forcave të Armatosura. Për të gjithë ata që këtë të drejtë e kanë pasur, por nuk e kanë ushtruar do ta marrin në formë monetare, por ndërkohë do të marrin një asistencë të tillë, një sasi parash dhe të gjithë ata që jo domosdoshmërisht shkojnë në stërvitje apo janë roje, sepse unë mendoj që edhe dikush që është në shtab dhe nuk është në stërvitje, duhet të konsiderohet pjesë e një trupe, që është kjo trupë që jemi të gjithë bashkë.
Ne menduam që t’i bënim një propozim qeverisë, të cilin qeveria e kaloi javën që shkoi, ku duke filluar që nga pagesat më të ulëta shpërblimi do të jetë pak më i madh dhe tek pagesat më të larta shpërblimi do të jetë më i vogël. Ky është vetëm hapi i parë drejt përmirësimit të mëtejshëm të kushteve në të cilat jetoni dhe punoni.
Do të ketë përmirësime të tjera që do të lidhen me strehimin, do të vazhdohet me legalizimet e të gjithë ndërtesave, ish-ndërtesave ushtarake të kthyera në banesa në vite, por të pa legalizuara, të pa vendosura brenda ligjeve të shtetit, pa certifikata pronësie.
Janë më shumë se 375 familje ushtarakësh aktivë ose jo të cilën e kanë fituar këtë të drejtë në një mënyrë ose një tjetër, por që gjenden përpara faktit që ata jetojnë prej më shumë se 20 vitesh në një banesë, ndofta fëmijët e tyre janë lindur dhe rritur atje, por që nuk disponojnë një dokument, i cili i bën ata pronar të shtëpive ku jetojnë.
Nuk do të jetë ky hapi i dytë dhe i fundit, përkundrazi, ne jemi duke punuar në mënyrë që të paktën për profesione apo specialitete të caktuara kemi filluar studimin me kohë të unifikimit të pagesës së tyre me pagesën e të njëjtit profesion në struktura të tjera.
Unë besoj fort dhe shpresoj që Komanda e Mbështetjes do të vazhdojë të jetë në krye të punëve për të treguar që gjërat bëhen edhe në kushtet e disa mungesave të konsiderueshme, por me shpresën që ato do të mund të përmirësohen”, ka përfunduar fjalën e saj ministrja e Mbrojtjes, Kodheli.
