Partnerët e koalicionit të ardhshëm qeveritar, PDK-LDK, kanë rënë dakord për ristrukturimin dhe ridizajnimin e ministrive. Sipas burimeve të “Express”, nuk do të ketë krijim të ministrive të reja, por disa ministrive do t’iu ndryshohen emrat. Kështu, Ministria e Kulturës, Rinisë dhe Sporteve, sipas disa burimeve, do të riemërohet Ministria e Kulturës, Teknologjisë dhe Inovacionit. Një zyrtar i PDK-së bëri me dije se kjo ministri edhe në vazhdim do të jetë nën menaxhimin e kësaj partie, derisa sipas tij, për këtë post është përmendur emri i Petrit Selimit, aktualisht Zëvendësministër i Punëve të Jashtme.
