Prokuroria e Korçës dërgon për gjykim kërkesën ndaj drejtorit të Shëndetit Publik, Devoll, Valent Nallbati, si edhe inxhinierit Panajot Pilani, të dy të akuzuar për falsifikim të dokumeneave dhe shpërdorim detyre, pasi, në vitin 2015, kanë realizuar procedurë fiktive për rikonstruksionin e godinës së institucionit, për punime të cilat ishin kryer në vitin 2011.
Hetimi ndaj të pandehurve është zhvilluar fillimisht me masën e sigurimit “arrest në burg”, e cila u ndryshua nga Gjykata e Apelit në “detyrim për paraqitje”.
Godina e Drejtorisë së Shëndetit Publik Devoll, është rikonsturktuar në mënyrë të plotë në vitin 2011, dhe mbikëqyrës punimesh ka qenë pikërisht shtetasi Panajot Pilani.
Pavarësisht këtij fakti, në momentin që ka marrë detyrën dhe në vazhdim shtetasi Valent Nallabati, ka kryer një sërë punimesh, rikonstruksioni në këtë godinë, nëpërmjet punonjësve të vetë këtij institucioni. Megjithëse kjo godinë dhe ambientet e jashtme të saj janë të rregulluara më së miri, duke marrë dhe komplimente nga banorët në rrjetin social “Facebook”, shtetasi Valent Nallbati, ka bërë kërkesën për çelje fondi dhe ka nisur një procedurë prokurimi, krejtësisht të panevojshme, për të kryer punime të cilat dukshëm janë të kryera. I pyetur si person nën hetim shtetasi Valent Nallbati, ka pretenduar se punimet që do të kryheshin nëpërmjet kësaj procedure prokurimi, janë të ndryshme nga ato që janë kryer më parë.
Ky pretendim vjen në kundërshtim të hapur me provat e grumbulluara gjatë hetimit dhe me gjendjen faktike të objektit në fjalë. Kështu referuar preventivit të përpiluar dhe procesverbalit të këqyrjes së objektit, rezulton se zërat e parashikuara në preventiv, janë të njëjta, me ato punime që janë të kryera në objekt dhe sipas specifikimeve të parashikuara. Më poshtë për ta bërë sa më të qartë, po marrim disa nga zërat më të dukshme të preventivit. Kështu në preventiv dhe në formularin e propozimit të projektit, është parashikuar ndërtimi i një ambient parkimi, garazh, me shtresë betoni, me profile metalike dhe me mbulesë plastike për të pasur një fuksion sa më praktik dhe me kosto të ulët (shih formularin e propozimit të projektit).
Referuar këqyrjes së jashtme të këtij objekti ky ambient parkimi, është i ndërtuar në mënyrë identike sikurse parashikohet në formularin e propozimit dhe në preventiv. Për sa i përket punimeve në murin rrethues, referuar preventivit formularit të propozimit të projektit, parashikohet muri guri 34.5 m, mur me blloqe beton 4.02 m.
Referuar këqyrjes së vendit të ngjarjes, rezulton se të dy këto zëra janë të kryera dhe pasqyrohen në mënyrë të qartë nga këqyrja e jashtme e objektit. Referuar preventivit dhe formularit të propozimit të projektit, parashikohet ndërtimi i kolonave në portën hyrëse dhe veshja e pllakave tranventine, duke i përshkruar në mënyrë të detajuar sikurse kanë qenë në objekt në momentin e hartimit të formularit dhe për më tepër ashtu sikurse janë edhe sot. Referuar preventivit dhe formularit të propozimit të projektit, është parashikuar vendosja e shtresave të pllakave dekorative në oborr dhe në lulishte, “pasi ato ekzistuese janë të dëmtuara”, relatohet ë formularin e propozimit të projektit.
Referuar këqyrjes në vendin e ngjarjes dhe pamjes me sy të lirë, këto pllaka, janë në gjendje shumë të mirë, pa asnjë dëmtim dhe shumë të bukura nga ana estetike. Referuar preventivit dhe formularit të propozimit të projektit, është parashikuar kryerja e punimeve dekorative, sistemim lulishte, duke parashikuar zërat përkatës të mbjelljes së pemëve, më konkretisht 8 pemë dekorative dhe 380 shkurre dekorative. Referuar këqyrjes së vendit të ngjarjes dhe gjendjes faktike, të gjitha këto janë të kryera,po ashtu edhe mbjellja e barit.
Po kështu referuar zërave të preventivit, konstatohet se janë parashikuar 8 kosha statikë, po aq sa edhe janë (në gjendje shumë të mirë), 2 projektorë (po aq sa janë të vendosur). Parashikohet 7 shtylla dekorative me nga dy ndriçues fener, sikurse janë specifikuar, rezultojnë se janë në ambientet e jashtme. Parashikohen stola druri çlodhës, sikurse janë në objekt, etj. Sa me sipër, u përmendën disa nga zërat e preventivit dhe formularit të propozimit, të cilët janë të dukshëm, lehtësisht të evidentueshëm dhe janë identike me specifikimet e përshkruara në preventivin e kësaj procedure prokurimi të zhvilluar. Gjithashtu edhe nëse I referohemi zërave të tjerë të preventivit, të gjitha këto punime “të parashikuar”, janë të kryera, madje disa prej tyre, po kryheshin nga punonjësit e institucionit, pikërisht gjatë periudhës që zhvillohej procedura e prokurimit. /Panorama
