Mendimet e qytetarëve janë të ndryshme.
Disa nga ata mendojnë se protesta nuk do të ketë kurrfarë efekti, kurse të tjerët bëjnë thirrje tek qytetarët e tjerë që gjithsesi t’ju bashkohen protestës.
Ka edhe nga ata që preferojnë të qëndrojnë neutral karshi kësaj çështjeje.
Qytetari Bekim Gashi, ka thënë për KosovaPress se të gjithë politikanët janë të njëjtë, dhe se nuk ka ndonjë mendim të mirë për ta.
“Me thanë të drejtën s’kam kurrfarë mendimi. A din pse? Të gjithë janë të njëjtë, sikur VV, PDK, LDK”, tha ai.
Ndërsa, sipas qytetarit, Halil Behluli, protesta do të ketë efekt, ndonëse ai tha se nuk do të marrë pjesë në protestë.
“Protestën e përkrahi, nuk do të dal sepse nuk kam kohë, mendoj se do te jetë efektive” tha Behluli.
Sabit Vrajolli ka shprehë shqetësim për bojkotim të protestës nga qytetarët.
Ai iu bënë thirrje qytetarëve që të dalin, sepse, sipas tij një grup i vogël protestuesish nuk është asgjë.
Qytetari tjetër, Alush Curri ka thënë se në Kosovë nuk duhet të protestohet vetëm për demarkacionin, por edhe për korrupsionin dhe përgjimet.
i tha se protesta duhet të jetë pa incidente dhe jo vetëm për një ditë se përndryshe nuk do të ketë efekt.
“Për protestën e 1 shtatorit iu bëj apel krejtve me dal, nuk është në pyetje vetëm demarkacioni me Malin e Zi, por janë shumë çështje që e preokupojnë popullin, më së shumti është korrupsioni, janë përgjimet, e unë iu kisha lut popullit që të del sa masivisht, jo me bo incidente e sene po në mënyrë paqësore për me largu këtë Qeveri…Do të ketë efekt, vetëm jo me një ditë, dy po le të vazhdon se në Perëndim kjo vazhdon me muaj, ndoshta me vite, derisa të realizohen kërkesat e qytetarëve, përndryshe nuk ka efekt”, tha Curri.
Halil Koliqi, theksoi se problemet e Kosovës është vështirë me i zgjidhë me këtë udhëheqësi në përgjithësi, qoftë ata të pozitës apo opozitës.
Koliqi, e rikthen vëmendjen tek pasuritë e Kosovës, veçanërisht aspektin e Trepçës, duke thënë se ky është problemi më i madh që ka Kosova.
“Çka kemi me mendu na? Na s’duhet me mendu hiç, le të mendojnë ata që janë nis.. këtu janë përzi të gjitha problemet në Kosovë, dhe është vështirë në këto mënyra me u zgjedh problemi i Kosovës, me këta udhëheqës në përgjithësi. Për këtë arsye aspekti politik në Kosovë është ngatërruar shumë, dhe nuk mund të zgjidhet as në këtë mënyrën qysh po thonë këta, as në mënyrën qysh po thonë ata.. Problemi i Kosovës nuk është vetëm demarkacioni, se ky nuk është një problem kumedit çfarë, problem më i madh i Kosovës është Trepça, pasuritë”, tha Koliqi.
Ndërkaq, Smajl Mulaj tha se protesta e 1 shtatorit duhet të jetë sa më masive.
“Protesta e 1 shtatorit duhet të me qenë masive, sepse nuk bon me humbë territorin e Kosovës, e kemi la me gjak”, tha Mulaj.
Mërgimtari Shefqet Bicaj, tha se këtu ka shumë gjëra të këqija, për të cilat duhet të protestohet, pasi sipas tij, politikanët nuk janë të vetëdijshëm, për atë që janë duke bërë.
“ Protesta e mirëseardhur është veç duhet të protestojmë për gjithçka të keqe këtu, ka shumë të këqija, mas pari kundër Qeverisë, kundër Kuvendit, kundër parlamentarëve që nuk janë të vetëdijshëm çka janë duke bërë”, tha Bicaj.
Përderisa Lëvizja Vetëvendosje ka paralajmëruar protestë më 1 shtator, dy partitë e tjera opozitare, AAK e Nisma, ende nuk e dinë se çka do të bëjnë ditën kur parashihet që në Kuvendin e Kosovës të votohet demarkacioni me Malin e Z. Krejt çka dihet deri më tani për dy partitë opozitare që janë bashkuar në një koalicion, është vota kundër demarkacionit dhe mospjesëmarrja në protesta.
