“Ministria të bëjë simpoziume për Çamërinë. Reciprocitet për çështjet me Greqinë”
Diskutimi mbi marrëdhëniet ndërmjet Shqipërisë dhe Greqisë në Komisionin e Politikës së Jashtme, ka shërbyer që kreu i PDIU-së, Shpëtim Idrizi, të denoncojë mbajtjen e konferencës shkencore të zhvilluar nga Ministria greke e Jashtme, mbi çështjen çame dhe apatinë e palës shqiptare. Në mbledhjen e djeshme të komisionit ishin të pranishëm dhe zyrtarët e MPJ-së, si sekretari i Përgjithshëm, Qirjako Qirko. Aty është prezantuar dhe promovimi i librit “Epiri i Veriut, Çështja pa kufi në diplomaci dhe në ligjet ndërkombëtare, 1912-2015”. “Nga kjo konferencë dalin disa përfundime, të cilat nuk mund t’i anashkalojmë. Së pari, del qartazi se shteti grek jo vetëm e di që çështja çame është një çështje për t’u zgjidhur, por po merr të gjitha masat që të ketë argumentet ligjore dhe historike kundër saj. Në këtë pikë, nuk prisja ndonjë qëndrim tjetër nga Greqia. Mirëpo, kjo rrëfen se shteti shqiptar nuk është në lartësinë e duhur. Nuk ka asnjë konferencë shkencore, të organizuar nga ju për çështjen çame, për të krijuar një dosje të plotë dhe serioze me argumente të forta juridike dhe historike përballë Greqisë. Qoftë edhe një konferencë, në të cilën të marrin pjesë edhe këta përfaqësues grekë, për të ballafaquar qëndrimet. Së dyti, Ministria e Jashtme greke, zyrtarisht përdor një term irredentist, Vorio Epirin. Është fakt se Çamëria është një territor gjeografik, që shtrihet në dy shtete sot, me shumicë shqiptare dikur. Ndërkohë, Vorio Epiri nuk është territor gjeografik, është një shpikje politike e vitit 1914, që tenton të karakterizoj trojet që shteti grek rivendikonte brenda shtetit shqiptar. Pra, është një term irredentist, i papranueshëm për dy shtete që kanë një traktat miqësie dhe që janë pjesë e një aleance ushtarake”, ka deklaruar kreu i PDIU-së. Idrizi gjithashtu qenë i prerë në qëndrimin e tij, duke i kërkuar Ministrisë së Jashtme të reagojë ndaj kësaj konference. “Ministria e Jashtme duhet të kundërveprojë menjëherë përballë këtij precedenti të rrezikshëm të përdorimit të një termi irredentist, që cenon tërësinë tokësore të Shqipërisë. Në këtë kontekst, kam edhe një pyetje të fundit: a ka pasur përfaqësues të shtetit shqiptar në këtë konferencë?”, tha Idrizi. Nënkryetari i Kuvendit kërkoi nga MPJ të zhvillojë konferenca mbi çështjen çame, të zgjidhet çështja e toponimeve dhe ajo e kufijve detarë në favor të interesave kombëtare. Gjithashtu kërkoj që për reciprocitet të kërkohet ngritja e varrezave të çamëve të masakruar në varreza masive në Çamëri, për të cilat kemi dhe vendndodhjet dhe hartat. Sekretari i Përgjithshëm i Ministrisë së Punëve të Jashtme, Qirjako Qirko, tha se marrëdhëniet dypalëshe midis Shqipërisë dhe Greqisë janë shumë miqësore, bashkëpunuese dhe në bazë mirëkuptimi. Qirko u shpreh se e gjithë problematika është e hapur për t’u trajtuar, diskutuar për zgjidhje të drejta dhe me interes në dobi të ndërsjellë, ku një shembull i mirë është zgjidhja e toponimeve. Në fjalën e tij, Qirko vuri theksin se problemet nuk duhet të përcaktojnë marrëdhëniet tona, por ato duhet të trajtohen në bazë të natyrës së tyre dhe realitetit që jetojmë, pa u ndikuar nga e shkuara. “Vijojnë diskutimet për zgjidhjen e çështjeve të mbetura nga e shkuara dhe vlerësoj si thelbësore heqjen e ligjit anakronik të luftës, si bazë për çlirimin e një energjie tejet pozitive në marrëdhëniet mes dy vendeve. Një energji, që do e shtrinte marrëdhënien tonë në një plan tjetër edhe më pozitiv”, theksoi Qirko.
