Presidenti i Komisionit Europian foli në një seancë jashtë radhe të Kuvendit që riktheu vetëm për të, opozitën në sallë
Presidenti i Komisionit Europian pohoi se Bashkimi Europian nuk do të jetë i bashkuar pa anëtarësimin e Europës Juglindore.
Zoti Barroso foli në një seancë jashtë radhe të Kuvendit që riktheu vetëm për të, opozitën në sallë.
“Përpara 10 vjetësh ne bashkuam Lindjen dhe Perëndimin pas dekadash ndarjesh. Ne e dimë që do të jetë i plotë bashkimi i Europës pa Europën Juglindore. Nga Tirana në Sarajevë nga Beogradi në Prishtinë njerëzit e shohin Bashkimin Europian si shpëtim”-tha presidenti Barroso.
Historia e fillimi të Luftës së Parë Botërore në Ballkan, nuk u la jashtë vëmendjes prej zotit Barroso, si një kujtesë se çfarë është mësuar:
“Ka qenë ky rajon, ku filloi Lufta e Parë Botërore. Unë mendoj se ju, shumë më shumë se të tjerët, mund të kuptoni se pse procesi i integrimit kuptohet shumë nga ky fakt. Ky është një proces paqeje, ndaj dhe BE ka marrë këtë çmim”.
Zoti Barroso, i cili do të zëvendësohet nga luksemburgasi Zhan-Klod Junker ishte i bindur në parashikimin se “Shqipëria do të bëhet pjesë e Bashkimit Europian”:
“Ju mund të merrni të mirat e anëtarësimit në BE, por mund të jepni dhe kontribut për qëndrueshmëri në rajon. Duhet të çoni sinjalin e duhur për kryerjen e platformave dhe aderimin më pas në BE. Kuvendi është mekanizëm për këshillime të gjera, për anëtarësimin e plotë në BE dhe ju duhet t’i mbani sytë te ky destinacion”.
Presidenti i KE-së tha se marrja e statusit ishte vlerësim për Shqipërinë si dhe tregues i domosdoshmërisë për bashkëpunim, dilaog dhe kryerjen e reformave.
Zoti Barroso u tha deputetëve se ishte i kënaqur që në “këtë moment historik” siç e quajti, e ndante me ta:
“Prej këtu fillon një fazë e re premtuese, i jep shtysë progresit të mëtejshëm se perspektiva e vendeve të Europës Juglindore është diçka reale, ne i mbajmë premtimet tona kur partnerët tanë arrijnë progres”.
Zoti Barroso kujtoi gjithashtu se përse ndihet i afërt me shqiptarët, pasi vjen nga një vend vuajtës i diktaturës, ndërsa u bë pjesë e ish-Tregut të Përbashkët Europian njëkohësisht me Spanjën në vitin 1986:
“Kam jetuar vetë 18 vjet në diktaturë. Unë e kam përjetuar shpresën që na ofronte Europa dhe se si përfituam. Kjo është arsyeja që unë ndihem pranë jush. Ju e lidhni të ardhmen e anëtarësimit me forcimin dhe modernizimin e institucioneve. Ky është procesi që duhet të motivoni”.
Çfarë është me rëndësi në këndvështrimin europian, që Shqipëria të ecë përpara e shpjegon zoti Barroso:
“Ju nuk po i ndërmerrni këto reforma për të kënaqur BE-në, por për qytetarët tuaj. Një gjyqësor më efikas do ketë një ndikim pozitiv për shqiptarët. Aplikimi i standardeve evropiane, do të japë reflektime të mira”.
Duke kujtuar se ka udhëhequr KE-në, zoti Barroso theksoi se reformat ja vlejnë, por gjithnjë me bashkëpunim:
“Duhen gjithnjë dy vetë për të arritur rezultatet, ndaj të gjithë qytetarët e Shqipërisë duhet ta dinë se duhet të plotësohen detyrimet që vinë nga anëtarësimi. Ne do t’shohin në mënyrë më realiste, si vend që do të aderojë në BE”.
Fillimisht, kryekuvendari Ilir Meta garantoi se institucionet janë dhe mbeten të hapura për dialog dhe mirëkuptim në qëllimin e përbashkët eurointegrues të vendit.
Sipas zotit Meta, “Kuvendi do të garantojë gjithëpërfshirje dhe dialog politik”:
“Ne jemi të përkushtuar ndaj vlerave demokratike që ka ngritur unioni, stabilitet, bashkëpunim, progres dhe integrim”.
Ndërsa thekosi se vendimi për t’i dhënë Shqipërisë statusin “kandidat “ishte i duhur dhe pozitiv, kryekuvendari tha edhe “njëkohësisht lajm i mirë edhe për shqiptarët dhe rolin që ata kanë në Ballkan”, ndërsa u zotua se
do të vijojmë të luajmë një rol stabilizues”. Denion Ndrenika
