Hidhen në protestë punonjësit e hekurudhës në Elbasan. Rreth 220 punonjës të hekurudhës që mbulon aksin Peqin-Pogradec u hodhën në protestë të mërkurën, duke bllokuar qarkullimin e transportit hekurudhor për mallra dhe udhëtarë. Punonjësit mbështeten nga sindikata. Kryetari i sindikatës Tan Valla u shpreh se vendimi u ndërmor, pasi nuk pati asnjë reflektim pas takimit të realizuar me Ministrin e Transporteve.
Punëtorët ankohen se kanë mjaft vështirësi, se punojnë si hamallë dhe marrin vetëm 18 mijë lekë, nuk u paguhen sigurimet shoqërore dhe se hekurudha është lënë pas dore dhe asnjë qeveri nuk kujdeset. Ata deklarojnë se kërkesat e tyre janë ekonomike dhe jo politike. Punëtorët janë të vendosur që ta vazhdojnë grevën. Pak ditë më parë ata realizuan një protestë paralajmëruese njëorëshe në Durrës. Ndërsa sot greva është ditore dhe në shkallë vendi.
Gjendja në transportin hekurudhor në Shqipëri është e mjeruar dhe pagat e punonjësve nga më të ulëtat e të gjithë sektorëve të ekonomisë. F.Salliu
