“Ka të dhëna nga kamerat dhe nga dëshmitarët se 17- vjeçarin e kishte zënë gjumi në mbeturina për shkak të orës së vonë dhe faktit se në orët e para të mëngjesit të datës 7 gusht kishte nisur të binte shi. Për këtë arsye, punëtorët kanë ndërprerë punën në seleksionimin e mbeturinave dhe kanë vendosur të pushojnë”, thanë për “Panorama” burimet nga hetimi.
Sipas tyre, disa punëtorë kanë hyrë poshtë strehëve në një ndërtesë që ndodhet aty pranë, ndërsa 17vjeçari Ardit Gjoklaj, me sa duket, ka vazhduar punën ose është ulur aty ku e ka zënë shiu. Hetuesit kanë dyshime se të riun e ka zënë gjumi aty dhe më pas, kur puna ka rinisur në landfilld, ekskavatori-kovë e ka goditur në kokë dhe në gjithë pjesët e trupit, duke e masakruar. Trupi më pas është lënë në plehra deri të nesërmen në orët e pasdites, kur kufoma është gjetur, me sa duket, nga punëtorët e tjerë të firmës, që kishin ndërruar turnin dhe kanë lajmëruar Policinë.
Fran Gjoklaj, xhaxhai tjetër i Ardit Gjoklajt, ka akuzuar direkt drejtuesin e ekskavatorit. “Kemi shumë pak fjalë për të thënë në këtë drejtim, por gjithë ankesa jonë shkon te fadromisti. Ai mbasi e ka mbytur, e ka mbështjellë me mbeturinat dhe ka dashur ta fshehë e ka thënë që ka ardhur i mbytur. Po ta kishte mbytur dhe të kishte thënë e mbyta pa dashje, do t’i kishim thënë hajde pi kafe, por ne na ka rënduar shumë se e ka fshehur për të mos u zbuluar dhe ka thënë që e kanë mbytur të tjerët. Nuk ka tjetër histori kjo punë”, ka thënë xhaxhai i viktimës.
Ai tha më tej se ditën e ngjarjes, nëna e priti në shtëpi Arditin deri në orën 09:30. “Më pas, ajo ka njoftuar njerëzit e saj dhe ne nisëm kërkimet. Në televizor ne pamë se ishte gjetur një trup pa jetë në Sharrë, por thanë se ishte 40 vjeçar, megjithatë ne thamë mos ishte ngatërresë dhe shkuam ta shihnim”, ka thënë Fran Gjoklaj.
