Kryeministri i vendit ka vazhduar me aktivitetet e tij për nderë të ditës së Pavarsisë. Haradinaj ka thënë se ish- presidenti Rugova shekullin e tij jetësor ia fali Kosovës.
“Presidenti Ibrahim Rugova shekullin e tij jetësor ia fali Kosovës. Përjetësisht do të qëndrojë në themelet e shtetit tonë sovran”, ka thënë ai.
Për këtë datë historike, Haradinaj ka thënë se personat e pagjetur janë zëri i muguar i Kosovës në 11- vjetorin e Pavarësisë.
“Të pagjeturit – zëri i munguar i Kosovës në Ditën e Pavarësisë”, ka shkruar ai.
***
Ngrihet solemnisht flamuri i Kosovës për 11 vjetor të pavarësisë
Flamuri shtetëror është ngritur solemnisht në oborrin e ndërtesës së Kuvendit dhe atë të Qeverisë së Kosovës për nder të 11 vjetorit të pavarësisë.
Në këtë ceremoni kanë marrë pjesë, presidenti i vendit, Hashim Thaçi dhe kryeministri Ramush Haradinaj.
Të njëjtit bën homazhe edhe pranë shtatores së ish presidentit, Ibrahim Rugova.
Agjenda Shtetërore për shënimin e 11-vjetorit të Pavarësisë së Kosovës
Në Kosovë sot shënohet 11 vjetori i shpalljes së Pavarësisë. Për këtë ditë janë paraparë aktivitete të ndryshme, duke filluar nga ora 08:00 e mëngjesit.
Në mëngjes do të mblidhet Qeveria, e cila do të mbajë mbledhje festive për nder të 11 vjetorit të Pavarësisë.
Pas gjysmë orë, bëhet ngritja solemne e Flamurit, ku do të marrë pjesë Presidenti Thaçi, krye-parlamentari Kadri Veseli dhe kryeministri Ramush Haradinaj.
Pastaj, të tre liderët politik do të vendosin kurora lulesh në Kompleksin Memorial ‘Adem Jashari’ në Prekaz.
Në ora 10:45, Kuvendi do të mbajë seancë solemne për nder të kësaj ditë të veçantë, ndërsa në ora 12:20, Trupat e FSK-së do të parakalojnë prej sheshit “Nënë Tereza” deri të sheshi “Ibrahim Rugova”.
Për të festuar këtë ditë, edhe një delegacion i huaj do të jetë në Kosovë.
Kështu, Kryeministri Haradinaj do të pres në ora 15:00 një delegacion 17-anëtarësh nga Shtetet e Bashkuara të Amerikës, të kryesuar nga Senatori James Inhofe.
Ndërsa, në mbrëmje, përkatësisht ora 18:30 do të bëhet ndezja e organizuara e fishekzjarrëve në sheshin “Zahir Pajaziti”.
Për shkak se edhe ky përvjetor e gjen vendin e izoluar, përfaqësues të organizatave studentore do të organizojnë një protestë artistike.
Kjo për të shfaqur pakënaqësitë në lidhje me vonesën e liberalizimit për qytetarët e Kosovës.
Protesta mbahet në kryeqytet në ora 13:00.
Ndërsa, aktivitete të ndryshme do të mbahen edhe nëpër komuna.
***
Haradinaj: Viti i konsolidimit si shtet, mbyllim temat e hapura
Qeveria e Kosovëska mbajtur një mbledhje solemne për nder të 11-vjetorit të Pavarësisë së Kosovës. Kryeministri Ramush Haradinaj, me këtë rast ka mbajtur një fjalim të shkurtër para kabinetit qeveritar ku tha se secili qytetar i Kosovës e ka rrëfimin e tij për rrugëtimin e shtetit të Kosovës për këto 11 vjet.
“Pavarësia jeton në ne. Secili prej nesh i ka rrugëtuar këto 11 vjet të Pavarësisë, çdo qytetar, secili prej nesh e ka rrëfimin e vet të rrugës së 11 vjetëve të shtetit. Edhe qeveria e vendit e ka rrëfimin e vet. Edhe kjo qeveri tani e ka rrëfimin e vet nga koha kur kemi marrë përgjegjësitë. Ajo që mendoj se është me rëndësi t’ua konfirmojmë qytetarëve të vendit është se me kujdesin më të madh jemi përballur me të gjitha çështjet që kanë ndodhur para Kosovës dhe Qeverisë dhe njëkohësisht me respektin më të madh për interesin e qytetarëve të vendit. Ka shumë vendime, ligje, pako ligjore, reformë. Ka gjithashtu vendime të mëdha si Ushtria, vendimet që lidhen me Trepçën dhe resurset tjera ekonomike– vendime të tjera ekonomike”, deklaroi Haradinaj.
Ai ka thënë se viti 2019 do të jetë viti kur Kosova do t’i përmbyllë të gjitha çështjet e hapura, duke përmendur edhe marrëveshjen finale me Serbinë.
“Në 10 vjetëshin e dytë që kemi hyrë, besoj që është një vit i konsolidimit tonë si shtet dhe i përmbylljes së të gjitha temave të mbetura të hapura në planin rajonal dhe ndërkombëtar, që nënkupton edhe marrëveshje për njohje obligative ligjore me Serbinë në kufijtë ekzistues, njëkohësisht edhe anëtarësim në NATO”.
